காமிக்ஸ் பூக்கள்

வாண்டுமாமாவின் மரகதச்சிலை!

2011-04-14T20:54:00.001+05:30

அனைருக்கும் தமிழ் புத்தாண்டு வாழ்த்துக்கள்! நண்பர் விஸ்வாவிற்கு பிறந்த நாள் வாழ்த்துகள்! சரியாக ஒரு வருடம் கழித்து மீண்டும் வந்திருக்கிறேன். பதிவிடுகிறேன் பேர்வழி என்று நானும் களத்தில் குதித்து விட்டாலும் அதனை தொடர்ந்து செய்ய முடியாத ஒரு சூழல் எனக்கு. ஆனாலும், என்னைவிட பரபரப்பான ஒரு சூழலில் பணி புரிந்தாலும் அவ்வபோது அருமையான பதிவுகளை இட்டு எழுத்தில் மட்டுமல்ல செயலிலும் “கிங்” என்பதை உணர செய்திருக்கும் நண்பர் விஸ்வாவிற்கு ”தமிழ் காமிக்ஸ் உலகத் தலைவன்” என்ற பட்டத்தை அளிக்க காமிக்ஸ் உலக மக்கள் முடிவு செய்துள்ளார்கள் என்பதை இந்த சந்தர்ப்த்தில் தமிழ் கூறும் நல்லுலகத்திற்கு தெரிவித்து கொள்கிறேன். வாழ்க தமிழ் காமிக்ஸ் உலகத் தலைவன்! (தமிழினத் தலைவர் உங்கள் நினைவிற்கு வந்து நீங்கள் கடுப்பனால் அதற்கு நான் பொறுப்பல்ல!)

சமீபத்தில் வாண்டுமாமாவின் இரண்டு சித்திரக் கதைகளை படித்தேன். ஒன்று மரகதச் சிலை மற்றொன்று ரத்தினபுரி ரகசியம். இரண்டு கதைகளையும் கங்கை புத்தக நிலையத்தார் (+(91)-(44)-24342810, 24996344, No 13, Opp To Pondy Bazaar Post Office, Deenadayalu Street, T Nagar, Chennai - 600017) ஒரே புத்தகமாக வெளியிட்டுள்ளனர். இந்த பதிவில் மரகதச் சிலையை பற்றி பார்க்கலாம்.

மன்னர் ருத்ரசிம்மரின் மகளை காளிக்கு பலியாக்க நினைக்கும் மந்திரவாதி நீலகேசியின் கோரிக்கையை மன்னரும் இளவரசர் ஆனந்தனும் எதிர்க்கிறார்கள். அவர்களை மந்திரப் பொடியால் மரகதச்சிலைகளாக்கி தூக்கிச் செல்கிறான் மந்திரவாதி நீலகேசி. இளவரசி நிர்மலா அவர்களை காப்பாற்றும்படி மகேந்திரபுரி மன்னர் மன்மதவர்மரிடம் கேட்டுக்கொள்கிறாள். அவரது மகன் இளவரசன் ஆதித்தன், நிர்மலா மற்றும் காளி என்ற குள்ளனுடன் சேர்ந்து மந்திரவாதி நீலகேசியை தேடிச் செல்கிறான்.

வழியில் எதிர்படும் டைனோசரை வென்று பயணத்தை தொடரும் ஆதித்தன் குழுவை வயோதிகர் வடிவில் வரும் மந்திரவாதி நீலகேசி எதிர்கொள்கிறான். நிர்மலாவை காட்டின் ஏதோ ஒரு இடத்தில் விட்டு விட்டு அவளது இடத்தில் மாயா மோகினியை நடிக்க சொல்கிறான். மோகினியும் ஆதித்தனை பலவாறு கேலி செய்து வெறுப்பேற்ற அவன் அவளை விட்டு விட்டு சென்று விடுகிறான். இதற்கிடையில் மந்திரவாதியின் மகள் நாகநந்தினி ரூபமதி என்ற பெயரில் ஆதித்தனுடன் வஞ்சமாக பேசி அவனை அலைகழிக்கிறாள். அவளிடம் மயங்காத ஆதித்தனை மந்திரபொடி நீரை பருக செய்து பலகீனம் அடைய செய்கிறாள். ரூபமதியை விட்டு விலகிய ஆதித்தனை மலைவிழுங்கி என்ற அரக்கன் எதிர்கொள்கிறான். ரூபமதியால் தூண்டப்பட்ட அவன் பலகீனமான ஆதித்தனை சிறைப்பிடிக்கிறான்.

இதற்கிடையில் மயக்கம் தெளிந்த நிர்மலாவை சிங்கம் ஒன்று பாதுகாக்கிறபோது ஆதித்தனின் வடிவில் உள்ள நீலகேசி வருகிறான். ரூபமதி அனுப்பிய வேங்கை மார்பனின் உதவியுடன் சிங்கத்தை கொன்று நிர்மலாவை சிறைபிடிக்கும்போது மனித தலையும் குதிரை, ஆடு, மான் ஆகியவற்றின் உடலுடன் கூடிய ஒரு விநோத கூட்டத்தினாரால் நிர்மலா காப்பாற்றப்படுகிறாள்.

ஒரு நாள் அழகிய ஓர் இளவரசன் பத்மநாபன் வந்து நிர்மலாவை தன்னுடன் கூட்டிசெல்கிறான். வழியில் காளியை சந்திக்கும் இவர்கள் ஆதித்தனை சிறை மீட்கச் முயற்சிக்கிறார்கள். மலைவிழுங்கி மற்றும் ஏழுதலை நாகத்தின் பாதுகாப்போடு உள்ள ரூபமதியுடன் போராடி அவர்களை வெல்லும் பத்மநாபன், காளி கூட்டணி இறுதியில் ஆதித்தனை சிறைமீட்கிறது. ரூபமதி தனது உண்மை நிலையான கிழ ரூபத்தை அடைந்து தோற்றோடி விடுகிறாள்.

நிர்மலா தன்னை விட்டு பத்நாபனுடன் சிரித்து பேசி மகிழ்வதை கண்டு பொறாமை கொண்ட ஆதித்தன் அவனை போருக்கு அழைக்கிறான். அப்போதுதான் இதுவரை பத்நாபன் வேடத்தில் இருந்தது குந்தள நாட்டு மன்னர் குபேரவரின் ஒரே மகளான இளவரசி பத்மினி என்று தெரியவருகிறது. அவளது கனவில் கண்ட கட்டழகு இளவரசனை மணம் புரிய வேண்டி தேச சஞ்சாரம் செய்து வரும்போதுதான் நிர்மலாவை கண்டு உதவியதாக தனது கதையை சொல்கிறாள்.

பிறகென்ன, ஆதித்தன் இரண்டு இளவரசிகள் மற்றும் குள்ளன் காளியுடன் தனது தேடல் பயணத்தை மீண்டும் தொடருகிறான். ஒரு குகையின் வழியே சென்று முனிவர்கள் தவம் செய்யும் பர்ணசாலையை அடைகிறார்கள். அங்கே ஒரு முனிவர் நீலவேணி என்ற பறக்கும் குதிரையை வெற்றி கொண்டால் மந்திரவாதி நீலகேசியை அழிக்கலாம் என்று கூறுகிறார்.

இளவரசிகளை பர்ணசாலையில் விட்டு விட்டு காளியுடன் சென்று நீலவேணி குதிரையை அடிமை கொள்கிறான் ஆதித்தன். பிறகு இளவரசிகளை தன்னுடன் கூட்டிக்கொண்டு பறக்கும் குதிரையில் மந்திரவாதியை தேடிச் செல்கிறான். இவர்களின் வருகையை மாயக்கண்ணாடியில் பார்க்கும் மந்திரவாதி தான் வளர்க்கும் யாழிமுக சிங்கம் என்ற கொடிய மிருகத்தை அவர்களின் மீது ஏவி விடுகிறான். பாம்பை தனது வாளாக கொண்ட, நெருப்பு கக்கும் அந்த மிருகத்தை இளவரசி பத்மினி, காளி இவர்களின் துணையுடன் கொல்கிறான் ஆதித்தன். உயிர்நிலையான யாழி மிருகம் இறந்தபோது மந்திரவாதி நீலகேசியும் இறந்து போகிறான். ஆனால், இப்போராட்டத்தில் குள்ளன் காளி மரணமடைய நேரிடுகிறது.

மரகச்சிலைகளை தேடி கண்டறிந்தபின், அவர்களின் மேல் நீலகேசியின் இரத்தத்தை தெளிக்க நிர்மலாவின் தாய், தந்தை மற்றும் சகோதரன் ஆனந்தன் ஆகியோர் உயிர் பெற்று எழுகிறார்கள்.

தனது கனவில் கண்ட கட்டழகன் ஆனந்தனே என்பதை அறிந்த இளவரசி பத்மினி நாணம் கொள்ள அவளை தனது அண்ணனின் கரம் பற்ற செய்கிறாள் இளவரசி நிர்மலா. தனது மகள் நிர்மலாவை மணம் செய்ய வேண்டுகிறார் மன்னர் ருத்ரசிம்மர். அப்புறமென்ன சுபம்தான்!

இயல்பான ஒரு மன்னர் காலத்து மந்திரத் தந்திர கதை போல தோன்றினாலும் உலகின் பல்வேறுபட்ட புராண கதைகளில் இருந்தும் சில புனைவுகளை வாண்டுமாமா இக்கதையில் கையாண்டிருப்பது கதைக்கு மெருகூட்டுகிறது.

நமது கோயில்களில் உள்ள யாழி சிலையை நாம் அனைவரும் பார்த்திருப்போம். அதன் புராணப் பின்னணி என்ன என்பது நம்மில் பெரும்பான்மையினருக்கு தெரியாது. இந்த யாழியையும் சீனா புராணக் கதைகளில் வரும் டிராகனையும் இணைத்து ஒரு புது வித உருவத்தை உருவாக்கியிருக்கும் வாண்டுமாமாவின் கற்பனையே கற்பனை.

கதையின் தொடக்கத்தில் வரும் டைனோசர், ஆதித்தன் போரிட பயன்படுத்தும் முற்பந்து, மலைவிழுங்கி அரக்கன் போன்ற படைப்புகள் எல்லாம் தான் அறிந்தவைகளை இயல்பான ஒரு கதையோட்டத்தில் ஒருங்கிணைக்கும் வாண்டுமாமாவின் திறனை வெளிபடுத்துகின்றன.

இக்கதையில் வரும் நீலவேணி என்ற பறக்கும் குதிரை, மான், குதிரை மனிதர்கள் போன்றவை கிரேக்க புராணக்களின் புனைவுகளை நமக்கேற்ற வகையில் மாற்றியமைக்கப்பட்ட படைப்புகளே ஆகும். இவற்றோடு ஏழுதைலை நாகம், மந்திரக்கண்ணாடி போன்ற நமது கலாச்சாரத்திற்கே உரிய புனைவுகளும் உரிய முறையில் கையாளப்ப்பட்டுள்ளன.

இந்த கதையை இப்போதுதான் படித்தேன். ஆனாலும், நன்றாகத்தான் இருக்கிறது. இதே கதையை சிறுவயதில் படித்திருந்த்தால் நிச்சயமாக ஒரு மகத்தான சுவராஷ்யத்தை உணர்ந்திருப்போம். தமிழின் திறமையான கதைசொல்லியான வாண்டுமாமாவை பற்றி நிறையவே அறிந்திருந்தாலும் ஒரு பதிப்பகத்தார் அவர் மீது கொண்டுள்ள மதிப்பை இந்த விவரக்குறிப்பின் மூலம் அறியலாம்.

தமிழ் காமிக்ஸ் கதைகளை உருவாக்குவதிலும், கதைகளுக்கேற்ற சித்திரங்களை வரைய ஓவியர்களை உற்சாகப்படுத்துவதிலும் வாண்டுமாமா ஒரு முன்மாதிரியாக விளங்கினார். மரகதச்சிலைக்கு ஓவியர் ரமணி சித்திரம் வரைந்துள்ளார். சித்திரங்கள் சுமார் என்ற வகையில் இருந்தாலும் மன்னர் காலத்து மந்திரவாதி கதைக்கு பொருத்தமாக உள்ளன.

பதிப்பகத்தாரின் கங்கையுரையில் ஒரு முக்கியமான விஷயம் சொல்லப்பட்டுள்ளது. அதுதான் வாண்டுமாமாவின் சித்திரகதைகளுக்கு ஓவியம் வரைபவர்கள் மேம்போக்காக முகங்களை மட்டும் வரையாமல் பின்புலக் காட்சிகளுடன் வரைகிறார்கள் என்பதே அது. எந்த அளவு உண்மை என்பதை கதையை படிக்கும் போது நம்மால் உணர முடியும்!

பூந்தளிரின் முதல் இதழ் - ஒரு பார்வை!

2010-04-14T21:31:00.003+05:30

___..•..____..•..___..•..____..•..___..•..____..•..___..•..____..•..___..•.___..•..____..•..___..•

சிலர் தங்களது பிறந்தநாளை குடும்பத்தோடு கொண்டாடுவர். சிலர் ஊரோடு கொண்டாடுவர். வெகுசிலரே தங்களுடைய பிறந்தநாளை உலகோடு கொண்டாடுவர். அந்த ஒரு சிலரில் நமது நண்பர் கிங் விஸ்வாவும் ஒருவர். உலக தமிழர்கள் உவகையோடு கொண்டாடும் இந்த உன்னத நாளை சிறப்பிக்கும் வகையில் வெளியிடப்படுகிறது பூந்தளிரின் முதல் இதழ் பற்றிய இந்த சிறப்பு பதிவு !

___..•..____..•..___..•..____..•..___..•..____..•..___..•..____..•..___..•.___..•..____..•..___..•

கேரளத்தில் பூம்பட்டா (வண்ணத்துப் பூச்சி) என்ற சிறுவர் இதழை வெற்றிகரமாக நடத்தி வந்த திரு. எஸ்.வி. பை அவர்கள் தமிழகச் சிறுவர்களை மகிழ்விக்க தமிழில் ஒரு சிறுவர் இதழை வெளியிட ஆர்வம் கொண்டிருந்தார். இதற்கான விளம்பரங்கள் 1982லேயே வெளியிடப்பட்டன. பல்வேறு காரணங்களால் திரு.பை அவர்களின் கனவு இரண்டு வருடங்கள் வரை நிறைவேறவேயில்லை.

1984ல் திரு.பை அவர்களின் கனவு நனவாயிற்று! அவரது கனவை நனவாக்கியவர் வேறு யாருமல்ல... நமது தமிழ் சிறுவர் இலக்கியத்தின் பிதாமகன் திரு. வாண்டுமாமா அவர்களேதான்!

எண்பதுகளில் கல்கி, இதயம் பேசுகிறது, கதிர், குங்குமம் போன்ற இதழ்களில் பணியாற்றி வந்தார் வாண்டுமாமா. சில நிறுவனங்களில் அவர் சந்தித்த கசப்பான அனுபவங்கள், குறைவான ஊதியம் போன்றவை அவரை தொடர்ந்து ஒரு பத்திரிக்கையில் பணியாற்ற விடவில்லை.

நல்லதொரு சிறுவர் இதழை வெளியிட வேண்டும் என்ற திரு. பையின் ஆர்வமும், நல்லதொரு நிறுவனத்தால் வெளியிடப்படும் சிறுவர் இதழில் பணியாற்ற வேண்டும் என்ற வாண்டுமாமாவின் தேடலும் ஒரு புள்ளில் முடிந்த நாள் தான் 1984ம் ஆண்டு அக்டோபர் மாதம் முதல் நாள். தமிழ் சிறுவர் இலக்கியத்தின் பொன்னாள்!

கோலாகலமாக நடந்த வெளியீட்டு விழாவில் அப்போதைய சென்னை உயர் நீதிமன்ற நீதிபதி திரு. மோகன் அவர்களால் வெளியிடப்பட்ட முதல் பூந்தளிரை அகில இந்திய தமிழ் எழுத்தாளர் சங்கத் தலைவரும் அமுதசுரபியின் ஆசிரியருமான திரு. விக்கிரமன் அவர்கள் பெற்றுக் கொண்டார்.

தொடக்கத்தில் பூந்தளிரில் பூம்பட்டாவின் தமிழாக்க படைப்புகளும், டிங்கிள் பத்திரிக்கையின் காமிக்ஸ் ஸ்டிரிப்புகளும் வெளிவந்தன. ஆறு மாதங்களுக்கு பின்னர் வாண்டுமாமா தமிழ் இலக்கியம் சார்ந்த கதைகள், அறிவியல், பொது அறிவு, வேடிக்கை விளையாட்டுகள் சார்ந்த படைப்புகளுக்கு முக்கியத்துவம் கொடுத்து பூம்பட்டா படைப்புகளை வெகுவாக குறைத்து விட்டார்.

வேறு எங்கும் கிடைக்காத வாய்ப்புகளும் வசதிகளும் சுதந்திரமும் பூந்தளிரில் வாண்டுமாவிற்கு திரு. பை அவர்களால் வழங்கப்பட்டது. அந்த வாய்ப்பை வரமாக பயன்படுத்தி வாண்டுமாமா பூந்தளிரை அற்புதமானதொரு சிறுவர் பத்திரிக்கையாக மெருகேற்றினார்.

பூந்தளிருடன் நமது இதிகாச, வரலாற்று கதைகளை காமிக்ஸ் வடிவில் வெளியிட்ட பூந்தளிர் அமர் சித்திரக்கதையும் வெளிவந்தது. ஆனால் பூந்தளிரை போல விற்பனையில் அது சாதனை படைக்கவில்லை. ஆனாலும் பூந்தளிர் நிற்கும் வரை அமர் சித்திரக்கதையும் வெளிவந்தது. நான் கூட 1986ல் இருந்த பூந்தளிர் வாங்கினாலும் பூந்தளிர் அமர் சித்திரக் கதையை வாங்கவில்லை. அதன் மதிப்பறிந்து பழைய புத்தகக் கடைகளில் தான் அவற்றை சேகரித்தேன்.

காமிக்ஸ் பூக்களில் முன்னரே பூந்தளிரைப் பற்றிய ஒரு விரிவான பதிவு வெளியிடப்பட்ட நிலையில் முதல் இதழின் சிற்சில பக்கங்களை படிப்பதை விட பார்ப்பதே சிறப்பு என்பது என் கருத்து!

முதல் இதழின் எடிட்டோரியல் உங்கள் பார்வைக்கு! இதழின் லோகோவிற்கு கொடுக்கப்ட்ட முக்கியத்துவத்தை காணுங்கள். பூந்தளிர் வாசகர்களால் மறக்கவியலாத லோகோ இது!

முதல் இதழின் உள்ளடக்கத்தை பார்த்தாலே பூந்தளிர் தமிழ் சிறுவர்களை கவர்ந்த ரகசியத்தை அறிந்து கொள்ளலாம்.
கபீஷ், காக்கை காளி உள்ளிட்ட 5 காமிக்ஸ் கதைகள் முதல் இதழில் வெளிவந்தன. முதல் இதழில் காக்கை காளியின் பெயர் 'காக்கா காளி'தான்.

முதல் இதழில் வெளிவந்த கபீஷ் கதை கபீஷ் விரும்பிகள் அவசியம் படிக்க வேண்டிய ஒரு கதை. இதன் மூலம் வேண்டியபோது நீளமாகும் வாலை கபீஷ் எவ்வாறு பெற்றான் என்பதை அறிந்து கொள்ளலாம்.

இவற்றுடன் ‘ஆகாயப்பயணம் ஆரம்பம்’, ‘அணிலை சந்தியுங்கள்’ ஆகிய காமிக்ஸ் வடிவ அறிவியல் உண்மைகளை கூறும் இரண்டு படைப்புகளும் வெளிவந்தன.

வாண்டுமாமா கிரேக்க புராணக் கதைகளை ‘கடவுளர்களின் கதை’யுடன் தொடங்கினார். கே. இராதாகிருஷ்ணன் அவர்களின் ‘வீரன் விஜயவர்மன்’ என்ற தொடர்கதை முதல் இதழிலேயே வெளிவரத் தொடங்கியது. இவற்றுடன் 6 சிறுகதைகள் வெளிவந்தன.

அட்டையுடன் சேர்த்து மொத்தம் 84 பக்கங்கள் உள்ள பூந்தளிர் 8 முழுப்பக்க விளம்பரங்களை கொண்டிருந்தது. அவற்றில் 7 பைகோவின் சொந்த நிறுவன விளம்பரங்கள். சிரிப்புத் துணுக்குகளை ஓவியர் விசுவும், கதைகளுக்கான படங்களை ஓவியர் செல்லம், கல்பனா, உமாபதி போன்றோரும் வரைந்திருந்னர்.

நன்றி: முதல் இதழை கொடுத்து உதவிய நண்பர் கிங் விஸ்வாவிற்கும் தனது வாழ்க்கை வரலாறான 'எதிர்நீச்சலில்' தனது பூந்தளிர் அனுபவங்களை பகிர்ந்து கொண்ட வாண்டுமாமாவிற்கும் எனது நன்றிகள்.

விடுமுறை தின சிறப்புச் செய்தி!

2010-01-01T23:31:00.003+05:30

நீண்ட நெடுங்காலத்திற்குப் பிறகு விடுமுறைதினத்தை (ஐடியா உதவி: நமது கலைஞர் தொலைக்காட்சி) சிறப்பிக்கும் வகையில் ஒரு முன்னோட்டத்தை காமிக்ஸ் பூக்கள் சிறுவர் இலக்கிய ஆர்வலர்களுக்கு அளிக்கிறது.

பூந்தளிர் அமர்சித்திரகதைகளை நம்மில் பெரும்பான்மையோர் அறிந்திருப்போம். இதற்கு முன்னோடியாக இண்டியா புக் ஹவுஸ் நிறுவனம் ‘அமர சித்ர கதைகள்‘ என்ற பெயரில் ஆங்கில சிறுவர்கதைகள் தமிழில் மொழிபெயர்த்து ஜீன் 1964 முதல் வெளியிட்டது. தற்போதைக்கு அவற்றின் அட்டைப்படங்களை காமிக்ஸ் ஆர்வலர்களின் பார்வைக்கு வைக்கிறேன். இது குறித்த பாரிய பதிவு விரைவில்...

சென்னையில் நடைபெற்று கொண்டிருக்கும் புத்தகக் கண்காட்சியில் நமது லயன் குழும இதழ்கள் INFO MAPS STALLல் விற்பனைக்கு வைக்கப்பட்டுள்ளன. வாசகப் பெருமக்கள் அனைவரும் இந்த வாய்பை தவறாமல் பயன்படுத்தி கொள்ள வேண்டுமாய் கேட்டுக்கொள்கிறேன்!

பூந்தளிர் - மறக்க இயலாத சிறுவர் இதழ்!

2009-06-09T05:36:00.004+05:30

_______________________________________________________________________________

பதினைந்து நாட்களுக்கு முன்னால் எனது அலைபேசியில் CELEBRATE-969 என்ற தகவல் குறுஞ்செய்தியாக அ.கொ.தீ.கவின் பிராந்திய தலைமையகத்திலிருந்து வந்தது. நமக்கு ஃபிளைட் 731, ஃபார்முலா X13, 007, 009, 001 ஏன் A-Z கூட தெரியும். CELEBRATE-969 என்றால் ஒன்றும் புரியவில்லை. பிறகுதான் நண்பர் விஸ்வா சொன்னார் 969 என்பது 2009ம் வருடம் ஜுன் மாதம் 9 ம் தேதியை குறிக்கும் என்றும், அன்றுதான் (அதாவது இன்றுதான்!) தன்னிகரில்லா தானைத்தலைவரும், நடமாடும் காமிக்ஸ் களஞ்சியமும், அ.கொ.தீ.காவின் நிறுவன மற்றும் நிறுவிய நிர்வாகத் தலைவருமான டாக்டர் செவனின் பிறந்த நாள் என்று! மேற்படி விவரப்படி தலைவரின் பிறந்தநாளை கொண்டாடும் பொருட்டு தமிழ் கூறும் நல்லுகத்திற்கு இந்த பதிவை அர்ப்பணிக்கிறேன்!

_______________________________________________________________________________

தமிழக சிறுவர் இலக்கிய உலகில் தனக்கென தனியிடத்தை பிடித்த இதழ் பூந்தளிர்! இதுவரை இதன் இடத்தை நிரப்ப ஒரு இதழ் கூட தமிழில் வரவில்லை. நம்மில் பெரும்பாலோனோருக்கு காமிக்ஸ் வடிவம் என்பது அறிமுகமானதே பூந்தளிர் இதழால்தான் என்பது என் கருத்து! எழுத்துக் கதைகளுக்கே முக்கியத்துவம் கொடுத்து வந்த அக்கால சிறுவர் இதழ்களிடையே படக்கதைகளுக்கு மூன்றில் ஒரு பங்கு பக்கங்களை ஒதுக்கி ஏறக்குறைய ஒரு காமிக்ஸ் போலவே வெளி வந்த ஒரு அறிவுப் பெட்டகம்தான் பூந்தளிர்.

பூந்தளிர் முகிழ்ந்த வரலாறு

கேரளாவில் பூம்பட்டா (Poompatta-வண்ணத்துப்பூச்சி) என்ற சிறுவர் இதழை வெற்றிகரமாக நடத்தி வந்த பைகோ (PAICO) நிறுவனம் சிறுவர் இதழ்களின் பொற்காலமான 1984ம் வருடம் அக்டோபர் முதல் தேதியன்று 'குழந்தைகளுக்கான புதுமைப் பத்திரிக்கை' என்ற ஸ்லோகத்துடன் பூந்தளிரை மாதம் இருமுறை இதழாக தொடங்கியது. அப்போது ரத்னபாலா, பாலமித்ரா, அம்புலிமாமா, கோகுலம், பாப்பா மஞ்சரி போன்ற சிறுவர் இதழ்கள் வெளிவந்து கொண்டிருந்தன. ஆனால் இதே காலக்கட்டத்தில் கேரளாவில் 9 சிறுவர் இதழ்கள் பூந்தளிரை போன்ற உள்ளடக்கத்துடன் வெளிவந்துள்ளன என்பது குறிப்பிடத்தக்கது. எனவே 1987ஐ போலவே 1984ம் வருடமும் தமிழ் காமிக்ஸ் வரலாற்றில் தவர்க்க இயலாத ஒரு வருடம் ஆகும். ஏனெனில் இந்த வருடத்தில் தான் ராணிக்காமிக்ஸ் அழகியைத் தேடி தனது பயணத்தை தொடர்ந்தது, லயன் காமிக்ஸ் சிங்க நடை போட்டு சிகரத்தில் ஏறியதும் இந்த ஆண்டுதான். மேத்தா காமிக்ஸ் வெளிவரத்தொடங்கிய ஆண்டும் 1984தான்.

ரூ. 2/- விலையில் 260, கோல்டன் டவர்ஸ், ராயப்பேட்டை ரோடு , சென்னை 14 என்ற முகவரியில் இருந்து வெளிவந்தது பூந்தளிர். அப்போது 20, 25 பைசாக்கள் தான் பள்ளிக்குச் செல்லும் சிறுவர்களுக்கு வழங்கப்பட்ட பாக்கெட் மணி என்பதை இங்கு நினைவில் கொள்ளவும்.

பைகோ நிறுவனத்தின் தினேஷ் வி.பை பூந்தளிரின் (கௌரவ) ஆசிரியராக இருந்தார். துணை ஆசிரியராக நமது வாண்டுமாமாதான் நியமிக்கப்பட்டார். சிறுவர் இலக்கியம் என்றால் பாடல்கள், விடுகதைகள், சிறுகதைகள் என்ற நிலையை மாற்றி சித்திரங்களின் மூலம் கதை சொல்வதே குழந்தைகளை எளிதில் கவரும் என்பதை பூந்தளிரின் மூலம் நிரூபித்து காட்டினார் வாண்டுமாமா. பூந்தளிர் வெறும் கதைகளை மட்டும் வெளியிடும் பொழுது போக்கு இதழாக அல்லாமல் ஒரு அறிவூட்டும் இதழாக (Edutainment) வாண்டுமாமாவின் கைவண்ணத்தில் வெளிவந்தது.

பூந்தளிர் வெளிவந்த காலக்கட்டத்தில் சிறுவர் இதழ்களில் படக்கதைகள் (Comics) வெளிவந்தாலும் அவை சிற்சில பக்களுக்கு தான் வெளிவரும். ஏனெனில் தமிழகத்தில் காமிக்ஸ்களை உருவாக்கும் திறன் கொண்ட ஓவியர்கள் மிகச்சிலரே இருந்தனர். நான் அறிந்த வரையில் செல்லம், வினு (கோகுலம்) , சுப்பு (ரத்னபாலா), ஜெயராஜ் (ரேகா காமிக்ஸ்), ரமணி (கோகுலம்), தாமரை (தினமணிக் கதிர், ரத்னபாலா), ஷங்கர் (அம்புலிமாமா, இராமகிருண விஜயம்), ஸ்ரீகாந்த் (பொன்னிக் காமிக்ஸ்) போன்ற தமிழக ஓவியர்கள் காமிக்ஸ் துறையில் பங்களிப்பு செய்திருக்கின்றனர். இவர்களுள் ஓவியர் செல்லம் அவர்களின் படைப்புகள் தமிழ் காமிக்ஸ் உலகில் எல்லோரின் கவனத்தை பெரிதும் கவர்ந்தவை ஆகும்.

வாண்டுமாமா அடிப்படையில் ஓர் ஓவியர், இதழ் வடிவமைப்பாளர் , சிறுவர் இலக்கியங்களைப் படைப்பதில் சாதனைப் படைத்தவர், அயல்நாட்டு இலக்கியங்களை தமிழ் குழந்தைகளுக்கு அறிமுகப்படுத்த வேண்டும் என்பதில் தீராத ஆர்வம் கொண்டவர், சிறுவர் இலக்கிய உலகில் புது புது உத்திகளை புகுத்துவதில் மன்னர். சிறுவர் இலக்கியத்தில் அவர் தொடாத துறைகளே இல்லை எனலாம். இவ்வளவு தகுதிகளை கொண்ட வாண்டுமாமாவுக்கு பைகோ நிறுவனம் மிகுந்த சுதந்திரத்தையும், பூந்தளிரை ஒரு முன்மாதிரி சிறுவர் இதழாக கொண்டுவர வேண்டிய வசதிகளையும் செய்து கொடுத்தது.

இந்திய காமிக்ஸ் உலகின் பிதாமகன் ஆனந்த்பை -ஆல் (Anand Pai) உருவாக்கப்பட்ட அமர்சித்திரக்கதா (Amar Chitra Katha), டிங்கிள் (TINKLE) ஆகியவற்றின் வெளியீட்டாளர்களான இந்தியா புக் கௌஸ் (India Book House) உடன் வியாபார ஒப்பந்த செய்திருந்தது பைகோ நிறுவனம். எனவே டிங்களில் வெளிவந்த காமிக்ஸ் படைப்புகள் வாண்டுமாமா வின் சுவையான மொழிப்பெயர்ப்புடன் பூந்தளிரில் வெளியாயின.

டிங்கிள் பத்திரிக்கையில் அயல்நாட்டு காமிக்ஸ்களுடன் போட்டி போடும் வகையில் எண்ணற்ற காமிக்ஸ் கதாப்பாத்திரங்கள், கதைகள் உருவாக்கப்பட்டன. மிகவும் திறமைவாய்ந்த நிறைய ஓவியர்களுக்கு டிங்கிளில் வாய்ப்பளிக்கப்பட்டது. அவர்களுள் காக்கை காளியை உருவாக்கிய பிரதீப் சாத் (Pradeep Sathe), சுப்பாண்டியை உருவாக்கிய வி. பி. ஹால்ப், (V.B. HALBE), ஹோட்ஜாவுக்கு உயிர் கொடுத்த ராம் வாயிர்கர் (RAM WAEERKAR), மற்றும் மகாரா (MAKARA), திலிப் கடம் (DILIP KADAM). நான்ரே (M.N.NANGRE) போன்றோர் முக்கியமானவர்கள்.

டிசம்ர் 1980ல் 28 பக்கங்களுடன் ரூ. 2.50 விலையில் மாத இதழாக முழு வண்ணத்தில் வெளிவந்தது டிங்கிள். இரண்டு வருடங்களுக்கு பின் மாதம் இருமுறை ஆனது (Jan 1983). கிட்டத்தட்ட 67 டிங்கிள் இதழ்கள் பூந்தளிர் வெளிவருவதற்கு முன்னரே வெளிவந்து விட்டன. இதனால் காமிக்ஸ் கதைகளுக்கு வற்றாத நீரூற்றாக டிங்கிளை பூந்தளிர் பயன்படுத்திக் கொள்ள முடிந்தது.

லூயிஸ் எம். ஃபெர்னான்டெஸ் (Luis M. Fernandes -script writer), பிரதீப் சாத் (Illstrator) கூட்டணியின் காக்கை காளியும், ஆனந்த் பை, மோகன்தாஸ் கூட்டணியின் கபீஷும்தான் பூந்தளிரின் ஆரம்பகால இதழ்களில் வெளிவந்த முக்கியமான காமிக்ஸ் பாத்திரங்கள்.

பூந்தளிர் என்றாலே முதலில் நினைவுக்கு வருவது கபீஷ். தன் மந்திர வாலின் வாலின் உதவியால் எதிரிகளிடம் இருந்து வன விலங்குகளை காக்கும் கபீஷ் கதைகள் ரங் ரேகா என்ற நிறுவனத்திடம் இருந்து பெறப்பட்டு வெளியிடப்பட்டன. ஆரம்ப கால டிங்கிள் இதழ்களில் கூட கபீஷ் கதைகள் வெளிவரவில்லை குறிப்பிடத்தக்கது. இக்கதைகளில் கபிஷ் நண்பர்களாக கரடி பபூச்சா, மான் பிந்து, கழுகு பஞ்சா, முயல் முத்து, அதன் அத்தை காரணி, யானை பந்திலா, வில்லன்களாக நரி சிகால், மந்த புத்தியுடைய புலி பீலு, வேட்டைக்காரன் தோப்பையா ஆகியோர் வருவர்.

காக்கை காளி என்ற காமிக்ஸ் பாத்திரம் பூந்தளிர் வாசகர்களால் மறக்க இயலாத ஒன்று. இக்கதைகளில் வரும் அப்பாவி முதலை துப் துப் அதனுடைய வில்ல நண்பன் நரி சமந்தகன் ஆகியோரின் சதிகளை காளி முறியடிப்பதுதான் கதை. பெரும்பாலான சமயங்களில் முதலை துப் துப்பின் முட்டாள் தனத்தை (அல்லது அப்பாவி தனத்தை)பயன்படுத்தியே காளி சமந்தகனின் திட்டங்களை முறியடிக்கும்.

முதல் வருட இதழ்களில் சுப்பாண்டி, தந்திகார மந்திரி, வேட்டைக்கார வேம்பு போன்ற காமிக்ஸ் பாத்திரங்கள் வெளிவரவில்லை. ஏனெனில் மூல இதழான டிங்கிளில் கூட அவை அப்போது உருவாக்கப்படவில்லை. ஹாட்ஜா தனி கதாபாத்திரமாக அறிமுகப்படுத்தப்படவில்லை.

விலங்குகள், பறவைகள் பற்றி காமிக்ஸ் வடிவில் விளக்கும் அஸ்வின், பிரதீப் சாத் கூட்டணியின் இரண்டு காமிக்ஸ் ஸ்டிரிப்புகள், (உ.தா: புலியைச் சந்தியுங்கள், கரடியை சந்தியுங்கள்), லூயிஸ் எம். ஃபெர்னான்டெஸ், ஆனந்த் மாண்ட் கூட்டணியின் அறிவியல் உண்மைகளை விளக்கும் காமிக்ஸ் ஸ்ட்ரிப்புகள் இவற்றுடன் காமிக்ஸ் வடிவ நாட்டுப்புறக் கதைகளும் டிங்கிளில் இருந்து மொழிமாற்றம் செய்யப்பட்டு பூந்தளிரில் வெளியிடப்பட்டன.

இந்தியா புக் கௌஸ் நிறுவனத்தால் வெளியிடப்பட்ட 'DOG DETECTIVE RANJA' என்ற காமிக்ஸ் கதைகள் Partp Sharma, Luis M. Fernandes, Pradeep Sathe கூட்டணியால் உருவாக்கப்பட்டு டிசம்பர் 1983லிலேயே டிங்கிளில் வெளிவரத்தொடங்கின. இக்கதைகள் தமிழாக்கம் செய்யப்பட்டு துப்பறியும் ரஞ்சன் என்ற பெயரில் பூந்தளிரில் வெளியிடப்பட்டன.

டிங்கிளில் காமிக்ஸின் கதை எழுதியவர், ஸ்கிரிப்ட் எழுதியவர், ஓவியர் இவர்களின் பெயர்களை வெளியிடுவார்கள். பூந்தளிரிர் அவை தவிர்க்கப்பட்டிருக்கும். விதிவிலக்காக கபீஷ் கதைகளில் மட்டும் உருவாக்கியவர்களின் பெயர்கள் இடம்பெற்றன.

அச்சும், வடிவமைப்பும்

பூந்தளிர் தொடக்கம் முதல் இறுதி வரை ஒரே அளவில்தான் அதாவது ஒன்றுக்கு எட்டு (1x8) என்று சொல்லப்படும் 140 செ.மீ. x 200 செ.மீ அளவில் இரண்டு வண்ணங்களில் வெளியிடப்பட்டது. எழுத்துருக்களின் வண்ணம் கருப்பாகவும் பின்னனி வண்ணம் காவி, பச்சை, சிவப்பு என மாறி மாறியும் அச்சிடப்பட்டன. இந்த இருவண்ண முறை நமது லயன் குழும இதழ்களிலும், இரத்னபாலா இதழிலும் பின்பற்றப்பட்டது.

முதல் சில ஆண்டுகள் பூந்தளிர் ஒவ்வொரு எழுத்தாக கோர்த்து அச்சிடும் முறையான டிடில் பிரஸ் முறையில்தான் அச்சிடப்பட்டிருக்கவேண்டும். ஏனெனில் அச்சில் இப்போதுள்ள (ஆப்செட் முறை) நேர்த்தி இருக்காது. ஆசிரியர் குழு சென்னையில் இருந்தாலும் கொச்சியில் உள்ள பைகோ அச்சகத்தில் தான் பூந்தளிர் அச்சிடப்பட்டது.

வாண்டுமாமா இயற்கையாகவே நல்ல ஓவியராகவும், வடிவமைப்பில் ஆர்வம் கொண்டவராகவும் இருந்தார். மேலும் அவருக்கு கிடைத்த ஓவியர்கள் குழு திறமைசாலிகளாக இருந்ததால் வடிவமைப்பில் பூந்தளிர் சமகால இதழ்களை விட நேர்த்தியாக இருந்தது.

போட்டிகள்

பூந்தளிரில் 'பூந்தளிர் அறிவுப் புதிர் போட்டி' என்ற பெயரில் குறுக்கெழுத்துப் போட்டி தொடர்ந்து வெளிவந்தது. சரியாக எழுதிய மூன்று நபர்களுக்கு ரூ. 50 பகிர்ந்து வழங்கப்பட்டது. இதை தவிர ஒட்டுப் படப்போட்டி, கதையின் முடிவை ஊகிக்கும் போட்டி என வகை வகையான போட்டிகள் பூந்தளிர் நடத்தப்பட்டன.

அயல்நாட்டுப் படைப்புகள்

'எட்டுத் திக்கும் உள்ள இலக்கியங்களை இங்கு கொண்டு வந்து சேர்ப்போம்' என்ற பாரதியின் கூற்றை தமிழ் சிறுவர் இலக்கிய உலகில் மெய்யாக்கியவர் வாண்டுமாமா. நமது நாட்டை போலவே கிரேக்கமும் எண்ணற்ற புராணக்கதைகளை கொண்டது. பூந்தளிரின் முதல் 21 இதழ்களில் தொடராக வெளிவந்த கிரேக்க புராணக் கதைகளின் மொழிப்பெயர்பும், வரையப்ட்ட சித்திரங்களும் படிப்பவரை மெய்மறக்கசெய்யும். இத்தொடருக்கு வரையப்பட்ட சித்திரங்கள் ஓவியர் செல்லத்தின் பாணியை ஒத்திருப்பதை காண்க.

வாசகர் கடிதங்கள்

ஆரம்பக் கால இதழ்களில் வாசகர் கடிதங்கள் இடம் பெற்றாலும் பின்பு அவை மறக்கப்பட்டன. எழுத்தாளர் பூவண்ணன், அரவக்குறிச்சிப்பட்டி எம்.அசோக்ராஜா, திருச்சி ராஜி ராதா போன்ற வெகுஜன பத்திரிக்கைகளிலும் எழுதிப் புகழ்பெற்றவர்கள் கூட பூந்தளிரில் வாசகர் கடிதங்கள் எழுதியுள்ளனர்.

கேரள மாநில நாட்டுப் புறக்கதைகள்

டிங்கிளின் ஆங்கிலப்பதிப்பில் இருந்து எப்படி காமிக்ஸ் ஸ்டிரிப்புகள் பெறப்பட்டதோ அதே வழியில் பூந்தளிரின் அண்ணனான பூம்பட்டாவிடம் இருந்து மலையாள நாட்டுப்புறக்கதைகள் பெறப்பட்டு பூந்தளிரில் வெளியிடப்பட்டன. இவற்றில் பெரும்பான்மையான கதைகளுக்கு சந்திரா என்பவர் ஓவியங்களை வரைந்திருப்பார்.

எளிய வழியில் ஆத்திசூடி, நன்னெறி

சிறுவயதில் பள்ளியில் ஔவையின் ஆத்திசூடி, நன்னெறி பாடல்களை வாத்தியார் சொல்ல படித்திருக்கிறோம். ஆனாலும் அதில் ஒரு இயந்திரத் தனம் இருக்கும். பாடலை முதலில் சொல்லி விட்டு பிறகு கருத்தை சொல்வார்கள். கருத்து மனதில் ஒட்டாது. (பாடலும் ஒட்டாது என்பது வேறு விஷயம்).

ஆனால் பூந்தளிரில் வாண்டுமாமா கதை சொல்வது போல பாடலின் கருத்தை முதலில் தனது தேன் சொட்டும் வார்த்தைகளால் சொல்லி விட்டு பிறகு பாடலை சொல்வார். பாடலில் உள்ள கடின வார்த்தைக்கு எளிய பொருளையும் சொல்வார். அதிலும் குறிப்பாக ஓவியர் செல்லத்தின் சித்திரங்கள் வாண்டுமாவின் கருத்தை பசு மரத்து ஆணி போல மனதில் பதிக்கும்.

சிறுகதைகள்

தொடக்கக் கால பூந்தளிர் இதழ்களில் கேரள நாட்டு எழுத்தாளர்கள் படைத்த சிறுகதைகள் இதழுக்கு மூன்று நான்கு என்ற அளவில் வெளிவந்தன. மெல்ல மெல்ல தமிழ் நாட்டுக் கதைகளின் எண்ணிக்கை அதிகரிக்கப்பட்டது.

அறிவியல் மற்றும் பொதுக் கட்டுரைகள்

கதைகள் மட்டுமன்றி அறிவியல் உண்மைகள், உலக நடப்புகள், வரலாற்று நிகழ்ச்சிகள் போன்றவற்றையும் சிறுவர்கள் தெரிந்து கொள்ள வேண்டும் என விரும்பினார். இதனால் பூந்தளிரில் நிறைய அறிவியல் கட்டுரைகளுக்கு இடம் அளிக்கப்பட்டது. பதினோராவது இதழில் இருந்து வெளிவந்த இந்த நாளில் அன்று நடந்து என்ற தொடர் வரலாற்று நிகழ்வுகளை உரிய புகைப்படங்களுடன் வெளியிட்டது. எனக்கு தெரிந்து மிக மோசமாக வடிவமைக்கப்பட்ட பூந்தளிர் பக்கங்கள் இவைகள்தான்.

விளம்பரங்களை பற்றிய ஒரு கட்டுரையில் செல்லத்தின் சித்திரங்கள் கட்டுரையை படிக்காமலே கட்டுரை என்ன சொல்ல வருகிறது என்பதை விளக்கும் பாங்கை கீழே காணுங்கள்.

ஓவியர்கள்

முதல் ஆண்டு முழுக்க பூந்தளிரில் ஆதிக்கம் செலுத்திய ஓவியர்கள் நமது செல்லம், உமாபதி, ராமு, சுதர்ஸன், விசு, உதய், பவித்ரா போன்றவர்கள். ஓவியர் கல்பனா ஆத்திச்சூடிக்கும், பாடல்களுக்கும் முதல் சில இதழ்களுக்கு மட்டுமே வரைந்திருப்பார் பின் அந்த பணியை செல்லம் தொடர்ந்தார்.

செல்லத்தை பொருத்தவரை முதலில் துணுக்குகள், சிரிப்புகளுக்கு மட்டுமே சித்திரங்களை வரைந்தார். பின்பு தொடர்கதைகள், சிறுகதைகள், பாடல்களுக்கு வரையும் வாய்ப்பு அவருக்கு கிடைத்தது. இதழுக்கு இதழ் செல்லத்தின் கைவண்ணம் பூந்தளிரில் அதிகரித்துக்கொண்டே வந்தன.

ஓவியர் உமாபதி (அவரது பெயர் குறிந்து சற்றே சந்தேகம் உண்டு. ஏனெனில் அவரது கையெழுத்தை ஜமாபதி என்று கூட படிக்கலாம்). நீண்ட காலம் பூந்தளிர் படைப்புகளுக்கு உயிரூட்டிய இவர் தொடக்கக் காலத்தில் வந்த வாண்டுமாமாவின் புலிக்குகைத் தொடருக்கு சித்திரம் தீட்டினார்.

ஓவியர் ராமு அக்காலக் கட்டத்தில் வெகுஜன இதழ்களில்(குறிப்பாக தினமணிக்கதிர்) புகழ்ப்பெற்று விளங்கினாலும் பூந்தளிரிலும் சிறுகதைகளுக்கும் பாடல்களுக்கும் சித்திரங்களை தீட்டித் தந்தார்.

எழுத்தாளர்கள்

கெளசிகன், மூர்த்தி ஆகிய பெயர்களிலும் தொடர்கள், மொழி மாற்றுக் கதைகள், அயல்நாட்டு இலக்கியங்கள், அறிவியல், வரலாற்றுக் கட்டுரைகள் போன்றவற்றை வாண்டுமாமா படைத்து வந்தார். இவருடன் பி.வி. கிரி, கே. இராதாகிருஷ்ணன், பாபநாசம் குறள் பித்தன், கே. விஸ்வநாதன், சிற்பி சோமு, வித்வான் வி. துரைசாமி, தமிழ்முடி, டாக்டர் என். ஸ்ரீதரன், திசை முத்து, பூவண்ணன், வண்ணை கணேசன், போன்ற எழுத்தளார்கள் கதைகள், கட்டுரைகளை எழுதியுள்ளனர்.

கவிஞர்கள்

இதழுக்கு இரண்டு சிறுவர் பாடல்கள் பூந்தளிரில் வெளிவந்தன. (நான் ஒரு பாடலை கூட படித்ததில்லை.) திருச்சி வாசுதேவன், தளவை இளங்குமரன், புலேந்திரன், வானம்பாடி, ஆர்.பி. சாரதி, தமிழ்முடி, இமயபாரதி, அழகனார், ரவி வர்மா, சித்திரப்பிரியா, அழகு பழனிச்சாமி, கா.பி. தங்கவேலன், குன்றக்குடியான் போன்ற கவிஞர்களின் படைப்புகள் பூந்தளிரில் தொடர்ந்து வெளிவந்தன.

புதிய முயற்சிகள்!

'அதிர்ஷ்டக் குழந்தைகள்' என்ற தலைப்பில் சிறந்த குழந்தைகளின் புகைப்படங்களை பரிசுகளுடன் (ரூ. 30, 20, 15) வெளியிடப்பட்டன. கவிதைகள், பாடல்கள், சிறுகதைகள், ஓவியங்கள், விடுகதைகள் போன்ற சிறுவர்களின் படைப்புகள் 'உங்கள் பக்கம்' என்ற தலைப்பில் வெளியிட்டன. வாசகர்களின் அறிவு பூர்வமான கேள்விகளுக்கு 'நீங்கள் கேட்டவை' என்ற தலைப்பின் கீழ் பதில்கள் வெளியாயின. அவற்றில் சில கேள்விகள் மீண்டும் மீண்டும் அச்சேறியதையும் காணமுடிகிறது.

பள்ளி மாணவர்களுக்கு சித்திரம் தீட்டும் போட்டிகள் பள்ளிகளில் நடத்தப்பெற்றன. தமிழத்தின் எல்லா பகுதிகளிலும் இப்போட்டி நடத்தப்படும் என்று அறிவித்திருந்தாலும் சென்னையில் மட்டுமே நடத்தப்பட்டது.

ஆனால் மேற்கண்ட முயற்சிகள் ஒரு சில இதழ்களுடன் முடிந்து போனது ஏன் என்று புரியவில்லை.

நடப்புச் செய்திகள்

ஆரம்பகால பூந்தளிர் இதழ்களில் பள்ளிகளில் நடந்த விழாக்கள், சிறுவர் சிறுமியர்களின் சாதனைகள், விழாக்களைப் பற்றிய நடப்புச் செய்திகள் (Current News) வெளியிடப்பட்டன. இதுவும் காலப்போக்கில் குறைந்துக் கொண்டே வந்து விட்டன.

பரிசுகள்

தற்காலத்தில் புத்தகங்களுக்கு ஒட்டும் லேபிள்கள், டைம் டேபிள்கள் போன்றவை எளிதில் மாணவர்களுக்கு கிடைக்கின்றன. ஆனால் 80களில் வண்ண லேபிள்கள் என்பது பட்டிணத்தோடு தொடர்புடைய சில பணக்கார மாணவர்களுக்கு மட்டுமே கிட்டக்கூடியவை. அத்தகையை சூழ்நிலையில் பூந்தளிர் பரிசாக அளித்த லேபிள்கள் வாசகர்கள் மத்தியில் எவ்வளவு வரவேற்பை பெற்றிருக்கும் என்பதை உங்கள் கற்பனைக்கே விட்டு விடுகிறேன். இந்த அறிவிப்புக்கு இரண்டு முழுப் பக்கங்களை ஒதுக்கப்பட்டிருப்பதையும கவனிக்கவும்.

காலத்திற்கு ஏற்றார் போல பூந்தளிர் தனது வாசகர்களுக்கு அளித்த மேலும் சில சுவாராஸ்மான பரிசுகள் கீழே.

பெரியவர்களாலும் படிக்கப்பட்ட பூந்தளிர்!

பூந்தளிரை எனக்கு அறிமுகப்படுத்தியது எனது அப்பாதான். அப்பாவும் பெரியப்பாவும் பூந்தளிர் படிப்பார்கள். எனது அப்பா, சித்தப்பா, பெரியப்பா ஆகியோர் திருச்சிக்கு அடிக்கடி செல்வார்கள். அவர்கள் மூலமாக பூந்தளிரை 1986ம் ஆண்டிலிருந்து தொடர்ந்து வாங்கினேன். சில சமயங்களில் பக்கத்து ஊரான மண்ணச்சநல்லுருக்கு செல்லும் வாய்ப்பு கிடைத்தபோது நானே பூந்தளிரை வாங்கும் வாய்ப்பும் கிடைக்கும். அந்த மகிழ்ச்சிக்கு இணை ஏது?

துரைராஜ் என்ற எனது ஆசிரியர் பள்ளிப்பருவத்தில் என்னுடன் பூந்தளிர் படிப்பார். அவருக்காகவே பூந்தளிரை பள்ளிக்கு எடுத்துச் செல்வேன். அறிவுப் புதிர் போட்டியில் என்னால் நிரப்ப இயலாதக் கட்டங்களை அவர்தான் நிரப்பித் தருவார். எல்லா கட்டங்களையும் நிரப்பி விட்டாலும் கூட சில சமயங்களில் மட்டுமே பூந்தளிருக்கு அவற்றை அனுப்பி வைப்பேன். ஒரு முறை கூட பரிசு வாங்கியதில்லை. ஆனாலும் இங்கு பெற்ற அறிவினால் இந்தியா டுடே, வாரமலர் இதழ்களில் தலா இரண்டு முறை பரிசுகள் பெற்றிருக்கிறேன்.

சுருங்க சொல்ல வேண்டுமானால் மாணவப் பருவத்தில் உள்ள சிறுவர்களுக்கு என்னென்ன தேவையோ அவற்றை எளியை நடையில் சித்திரங்களுக்கு முக்கியத்துவம் கொடுத்து அளித்தது. எனவே தான் பூந்தளிர் படிப்பதை பெரியவர்கள் ஊக்குவித்ததோடு அவர்கள் படிக்கவும் செய்தார்கள்.

சிரிப்பு மற்றும் செய்தித் துணுக்குகள்

பூந்தளிரில் இடம் நிரப்பிகளாக (Fillers) சுவராஷ்யமான செய்திகளும், சிரிப்புகளும் வெளியிடப்பட்டன. கீழேயுள்ள ஸ்கேனில் முதல் துணுக்கு உங்களுக்கு ஆர்வமூட்டும் என்று நினைக்கிறேன். சிரிப்புகளில் விசு, உதய் இவர்களின் ஓவியப் பாணி ஒரே மாதிரியாக இருப்பதை கவனிக்கவும்.

மேலும் பொதுஅறிவை வளர்க்கும் செய்திகள் முழு பக்கத்திலும் வெளியிடப்பட்டன. செல்லத்தின் சித்திரங்கள் படிக்கும செய்திகளுக்கு மேலும் சுவையூட்டுவதாக அமைந்திருந்தன. பூனையிடம் இருந்து தப்பிக்கும் எலி என்ற வசனமற்ற காமிக்ஸ் பூந்தளிரின் ஒவ்வொரு இதழிலம் இடம்பெற்றன.

தொடர்கள்

யானைகளை மையமாகக் கொண்ட கதைகள் மற்றும் யானைகளை பற்றிய துணுக்குகளுடன் வெளிவந்த 'யானைக்கதைகள்', கிரேக்கப் புராணக்தைகள் ஆகியத் தொடர்கள் வாண்டுமாமாவால் எழுதப்பட்டன. கே. இராதகிருஷ்ணன் 'வீரன் விஜயவர்மன்' என்ற தொடர்கதையை எழுதினார். பூந்தளிரின் 13ம் இதழில் இருந்து வெளியான வாண்டுமாமாவின் 'புலிக்குகை' ஒரு புகழ்ப்பெற்ற தொடர்கதையாகும்.

விளம்பரங்கள்

முதலாண்டுப் பூந்தளிரில் முழுக்க முழுக்க பைகோ நிறுவனத்தின் விளம்பரங்கள் மட்டுமே வெளியாயின. ஒரே ஒரு முறை சந்தனுவின் ஓவியப்பயிற்சி பற்றிய விளம்பரம் வெளியானது. மகாபாரதக் கதையை 60 இதழ்களாக பூந்தளிர் அமர் சித்திரக் கதை வெளியிட்டது. அதனை பற்றிய இரண்டுப்பக்க விளம்பரம் உங்களின் பார்வைக்கு.

சென்னையில் பைகோ பொம்மை உலகம் என்ற நிறுவனத்தையும் பைகோ நிறுவனம் நடத்தியது. இதைப் பற்றிய விளம்பரங்களும் பூந்தளிரில் வெளிவந்தன. மேற்படி நிறுவனத்திற்கு சென்று பொம்மைகள் வாங்கிய பாக்கியவான்கள் யாரேனும் நமது வட்டத்தில் உண்டா என தெரியவில்லை?

பின் அட்டையில் பூந்தளிர் மற்றும் பூந்தளிர் அமர்சித்திரக்கதைகளின் விளம்பரங்கள் மிகவும் அட்டகாசமாக இருக்கும். செல்லத்தின் கைவண்ணத்தை கீழே காணுங்கள்.

மொழிப்பெயர்ப்பு

வாண்டுமாமாவின் மொழிப்பெயர்ப்பு வெகு இயல்பாக உறுத்தாத வகையில் இருக்கும். விஜயன், வாண்டுமாமா இவர்களின் திறமையை இந்திரஜால் காமிக்ஸ்களின் தமிழ் பதிப்பை படித்து ஒப்பிட்டால் தெளிவாக உணர்ந்து கொள்ள முடியும்.

வெகுஜன இதழ்களின் பாதிப்பு

துக்ளக், ஆனந்த விகடன் போன்ற இதழ்கள் கற்பனைச் செய்திகளை தினசரி வடிவில் வெளியிட்டு (பெரும் பாலும் நடப்பு செய்திகளை கலாய்க்கும் பாணி) வாசகர்களை மகிழ்விக்கும். பூந்தளிரும் ஒருமுறை மகாபாரத நிகழ்வுகளை செய்தித்தாள் வடிவில் வெளியிட்டு அசத்தியது.

புதிர்கள், விளையாட்டுகள்

அக்காலக் கட்டதில் பிரபலமாக இருந்த வித்யாசங்களை கண்டறிதல், புள்ளிகளை இணைத்து உருவங்களை உருவாக்குதல், வழிக் கண்டுபிடித்தல் போன்றவற்றுடன் டிங்கிளில் வெளிவந்த TINKLE TRICKS & TREATS என்ற பகுதி 'பூந்தளிர் புதிர்கள்' என்ற பெயரில் வெளிவந்தன. வாண்டுமாமா அவற்றை எப்படி எடிட் செய்துள்ளார் என்பது மிகவும் கவனிக்கத்தக்கது.

பள்ளிப் பருவத்தில் காகிதங்களில் உருவங்கள் செய்வது, எளிய மேஜிக் செய்வது, விளையாட்டுப்பொருட்கள் செய்வது போன்றவை மற்றவர்களிடம் இருந்து நம்மை உயர்த்தி வைக்க பயன்பட்டன. எங்கள் பள்ளியில் நான் மட்டுமே பூந்தளிர் வாசகன். பூந்தளிரில் வெளிவந்த எத்தனையோ விஷயங்கள் என்னை மற்றவர்களை விட ஒரு படி உயர்த்தியே வைத்திருந்தன.

பூந்தளிரின் போற்றத்தக்க 'லெட்டரிங்'

தொடக்கால பூந்தளிரில் வெளியான காமிக்ஸ் கதைகளில் வசனங்கள் கைகளால் எழுதப்பட்டன. இரண்டு திறமைமிக்க எழுத்தோவியர்கள் (Lettering Artists) பூந்தளிரில் பணிப்புரிந்து இருக்க வேண்டும். நான் அறிந்தவரையில் இவ்வளவு அழகான, சீரான எழுத்துத்திறனை தமிழில் எங்கேயும் கண்டதில்லை. மிகவும் போற்றத் தக்கவகையில் லெட்டரிங் பணியை செய்தவர்கள் யார் என்று தெரியவில்லை என்பது சற்றே வருத்தற்குரிய செய்திதான்.

முதல் வருடத்தின் சிறந்த காமிக்ஸ் கதை!

முதல் வருடத்தில் எத்தனையோ காமிக்ஸ் கதைகள் பூந்தளிரில் வெளிவந்திருந்தாலும் கதை, ஓவியத் தரம், கதை போதிக்கும் நீதி என எல்லாவற்றிலும் என்னை கவர்ந்தது 'புண்ணிகோடி' என்ற கர்நாடக நாட்டுபுறக் கதைதான். இதனை கதையாக்கம் செய்தவர் சுப்பா ராவ் (Subba Rao), சித்திரம் தீட்டியவர் சந்திரநாத் (K. Chandranath). உணர்வுகளை அற்புதமாக வெளிப்படுத்தும் தாய், கன்று, புலி ஆகிய பாத்திரங்களின் கண்களை காணுங்கள்.

எப்படி? எப்படி?

பூனைக்கு எலி பகையானது எப்படி? நாய் மனிதனுக்கு நண்பனாது எப்படி? குதிரை மனிதனுக்கு அடிமையானது எப்படி? வானில் மனிதக்கூட்ட வடிவ நட்சத்திரங்கள் தோன்றியது எப்படி? என இயற்கை நிகழ்வுகளுக்கு கற்பிதம் செய்து கதை சொல்வதும், கேட்பதும் எல்லோருக்கும் பிடித்தவை. இது போன்ற நிறைய கதைகள் காமிக்ஸ் வடிவிலும், எழுத்துக் கதைகளாகவும் பூந்தளிரில் வெளிவந்துள்ளன. ஒத்த கதையம்சம் கொண்ட இரு கதைகளை இரண்டு வடிவங்களில் கீழே காணுங்கள்.

இன்னும் பல செய்திகள்...

மேலே நீங்கள் படித்த விமர்சனம் பூந்தளிர் முதலாண்டு இதழ்களை அடிப்படையாக கொண்டு எழுதப்பட்டது.
ஐந்து ஆண்டுகள் வெற்றிகரமாக வெளிவந்த பூந்தளிர் ஆறாம் ஆண்டில் 3 இதழ்களுடன் நின்று போனது. இதற்கு தொழிலாளர்கள் பிரச்சினைதான் காரணம் என்று அப்போது கூறப் பட்டது.
சில ஆண்டுகளுக்கு பின்னர் பார்வதி பதிப்பகத்தால் வாண்டுமாமாவை ஆசிரியராக கொண்டு பூந்தளிர் மீண்டும் வெளியிடப்பட்டது. சில ஆண்டுகளுக்கு பின்னர் அதுவும் நின்று போனது சோகத்தின் உச்சம்!
பூந்தளிர் போலவே பூம்பட்டா இதழும் தற்போது வெளிவரவில்லை.

மேலும் அறிந்து கொள்ள...

1. காமிக்காலஜி 2. The Hindu 3. The Hindu - Madurai

நகைச்சுவை எழுத்தாளர் சுதர்ஸன் மறைவு

2009-06-04T22:19:00.002+05:30

வார, மாத இதழ்களில் வெளிவரும் 'ஜோக்' குகளில் ஓரிரு வசனங்களுடன் ஒரே சித்திரத்துடன் வருபவை, அடுத்தடுத்த நிகழ்வுகளை தொடர்சித்திரங்களாக வரைந்து வசனங்களுடன் அல்லது வசனங்கள் இல்லாமல் வருபவை ஆகிய இரு பெரும் வகைகளும் அடக்கம். இரண்டாம் வகை காமிக்ஸ் உலகத்தின் முதலடியாகும்.

தமிழகத்தில் ஜோக்குகளை காமிக்ஸ் வடிவத்தில் படைக்கும் முன்னோடிகளில் ஒருவர்தான் சுதர்ஸன். நகைச்சுவை எழுத்தாளரான இவர், அவற்றிற்கு சித்திரங்களை வரையும் திறமை கொண்டவராகவும் இருந்தார். வாரமலர் இதழில் இவரது ஜோக்குகள் புகழ்பெற்றவை. இவரது ஓவியங்கள் கிறுக்கல்கள் போல தோன்றினாலும் பார்ப்பவர்களை யோசிக்காமல் சிரிக்க வைக்கும். வெகுஜன இதழ்களில் மட்டுமன்றி பூந்தளிர் போன்ற சிறுவர் இதழ்களில் கூட இவரது ஜோக்குகள் வெளிவந்திருக்கின்றன.

சமீபத்தில் சுதர்ஸன் அவர்கள் காலமானார். அவரைப் பற்றி தினமலர் / வாரமலர் இதழில் வெளிவந்த செய்தியையும், பூந்தளிரில் வெளிவந்த சுதர்ஸன் அவர்களின் ஜோக்குகளையும் உங்கள் பார்வைக்கு வைக்கிறேன். தமிழ் காமிக்ஸ் உலகம் சார்பில் அண்ணாரது இழப்பிற்கு ஆழ்ந்த இரங்களை தெரிவித்துக் கொள்கிறோம்.

தமிழ் காமிக்ஸ் முன்னோடிகள் - ஆர்.வி!

2009-04-14T21:18:00.022+05:30

நீண்ட...... நெடுங்காலத்திற்கு பின் மீண்டும் சந்திக்கிறேன். இனி இந்த தொய்வு இருக்காது. இடைப்பட்ட காலத்திற்குள் நண்பர்கள் எவ்வளோவோ சாதித்துள்ளார்கள். நான் சற்றே பின் தங்கி விட்டேன். இருப்பினும் உங்களை தொட்டு விட முயற்சிக்கிறேன். அனைவருக்கும் புத்தாண்டு வாழ்த்துக்கள்! அன்பு நண்பர் விஸ்வா-விற்கு பிறந்த நாள் வாழ்த்துக்கள்!

தமிழ் காமிக்ஸ் படைப்புகளில் பெரும்பான்மையான படைப்புகள் பிற மொழிகளில் இருந்து தமிழில் மொழி மாற்றம் செய்யப்பட்டவையே! நமது லயன் குடும்ப வெளியீட்டாளர்களின் பங்கு குன்றில் இட்ட விளக்கு போல யாவரும் அறிந்ததே. இவர்களுக்கும் முன்னால் ஒரு சில படைப்பாளர்கள் தமிழ் கலாச்சார பின்னணி கொண்ட கதைகளை உள்ளூர் ஓவியர்களை கொண்டு காமிக்ஸ் வடிவில் படைத்துள்ளனர். அவர்களில் முதன்மையானவர் 'ஆர். வி.' என்று அழைக்கப்பட்ட ஆர். வெங்கட்ராமன். ஆயிரம் பிறைகள் கண்ட ஆர். வி 20 நாவல்கள், 500 -க்கும் மேற்பட்ட சிறுகதைகளை படைத்துள்ளார். 1950-70 - களில் 'கண்ணன்' என்ற சிறுவர் இதழில் ஆசிரியராக பணிபுரிந்தார்.

குழந்தைகளுக்காக 25-க்கும் மேற்பட்ட நாவல்களையும் 15-க்கும் மேற்பட்ட காமிக்ஸ்-களையும் ஆர். வி. படைத்துள்ளார். சிறுவர் இலக்கியப் பணிக்காக பல்வேறு விருதுகளை பெற்றவர் ஆர். வி. கண்ணன் சிறுவர் இதழ் 1930-களில் தமிழுக்கு பெருந்தொண்டாற்றிய கலைமகள் குழுமத்தால் வெளியிடப்பட்டது. ஆர். வி. படைத்த 'இரு சகோதரர்கள்' என்ற சித்திரக்கதையை உங்கள் பார்வைக்கு வைக்கிறேன். எண்பதுகளில் பூந்தளிர், கோகுலம் போன்ற இதழ்களில் ஒரு சில பக்கங்களில் வந்த கதைகள் போன்றதுதான் இந்த கதை.

சித்தியால் கொடுமைப் படுத்தப்பட்ட இரு இளவரசர்கள் அரண்மனையை விட்டு வெளியேறுகிறார்கள். போகும் வழியில் ஒரு பாறை மேல் இளைப்பாறும்போது ஒரு பூதம் தோன்றி மூத்தவன் (குமார்) மன்னன் ஆவான் என்றும் இளையவன் (சுகுமார்) மந்திரி ஆவான் என்றும் கூறி மறைகிறது. வழியில் தம்பியை பிரியும் குமார் யானையால் ஒரு நாட்டின் மன்னனாக தேர்ந்தெடுக்கப் படுகிறான். தொலைந்து போன தம்பியை தேட முனைந்து அதில் தோல்வி காண்கிறான். இதற்கிடையே பாம்பால் தீண்டப்பட்டு மரணம் அடையும் சுகுமார் ஒரு மந்திரவாதியால் காப்பற்றப்பட்டு ஒரு கிழவியை சந்திக்கிறான். அரக்கனை கொன்றால் நாட்டில் பாதியும், தனது மகளையும் தருவதாக அந்த நாட்டின் மன்னன் அறிவித்து இருந்தான். கிழவியும் அந்த அரக்கனால் கஷ்டபடுவதை அறிந்து அரக்கனை கொல்கிறான். ஆனால் ஒரு ஏமாற்று பேர்வழி சுகுமாரை ஏமாற்றி அரசை அடைகிறான். சுகுமாரை கொல்லவும் முனைகிறான். தப்பிய சுகுமார் கப்பலில் நாடுகளை சுற்றுகிறான். திறமையான சிற்பியாகவும் மாறுகிறான். ஒரு நாள் ஒரு நாட்டின் மந்திரி தனது மகளுடன் கப்பலுக்கு வர அவளிடம் காதல் வயப்படுகிறான் சுகுமார். மந்திரி சுகுமாரை கொல்ல முனைய அவன் மன்னனிடம் நீதி கேட்க போகிறான். அப்போது மன்னன் தனது அண்ணன்தான் என்பதை அறிகிறான். மந்திரி தனது மந்திரி பதவியையும் மகளையும் சுகுமாருக்கு அளிக்கிறான். முன்பு ஏமாற்றியவனை வென்று அவனது ராஜ்யத்தை அண்ணனின் ராஜ்யத்துடன் இணைக்கும் சுகுமார் மன்னனின் மகளை அண்ணனுக்கு மணம் முடிக்கிறான். பிறகு என்ன? சுபம்தான்!

ஸ்ரீ என்பவர் சிறப்பாக சித்திரங்களை தீட்டியுள்ளார். இருபது பக்கங்களில் கருப்பு வெள்ளையில் வானதி பதிப்பகத்தால் இந்த காமிக்ஸ் வெளியிடப்பட்டுள்ளது. 1973 -ல் ஐந்தாம் பதிப்பாக வெளிவந்த இந்த காமிக்ஸ் மிக நேர்த்தியாக பதிக்கபெற்றுள்ளது. சிறுவர் இலக்கியத்தில் வானதி நிறுவனம் மிகுந்த ஆர்வம் கொண்டிருந்ததை இதன் மூலம் நம்மால் அறிய முடிகிறது.

நன்றி: ஆர்.வி., வானதி பதிப்பகம், ஸ்ரீ, தினமணி-சிறுவர்மணி, கிங் விஸ்வா மற்றும் இணைய நண்பர்கள்

கன்னித் தீவு - முடிவற்றக் கதையா?

2008-12-28T19:00:00.003+05:30

'கன்னித் தீவு' என்ற வார்த்தைகள் காமிக்ஸ் ஆர்வம் கொண்டோர்கள் மட்டுமல்ல சராசரி தமிழ் வாசகர்கள் கூட அறிந்தவை. தினத்தந்தியில் 47 வருடங்களாக தொடர்ந்து வெளிவரும் காமிக்ஸ் ஸ்ட்ரிப் கன்னித் தீவு. இது 1961 -இல் வெளிவர தொடங்கியிருக்க வேண்டும் என்பது என் கணிப்பு. தற்போதைய கன்னித் தீவு '17,226' நாட்களை தாண்டியுள்ளது.

தொடக்க காலத்தில் இரண்டாம் பக்க அடியில் வெளி வந்தது. பின்னர் இரண்டாம் பக்க மேற்பகுதியில் இன்றுவரை வெளியிடபடுகிறது. பாலன் என்ற ஓவியர் தான் தொடர்ந்து வரைந்து கொண்டிருக்கிறார்? 1961-இல் அவருக்கு வயது 20 என்றாலும் கூட தற்போது அவருக்கு 67 வயதாக இருக்க வேண்டும். இது சாத்தியமில்லை. எனவே தற்போதுள்ள பாலனும், ஆரம்ப கால பாலனும் ஒருவரே என்பது கேள்விக்குரியதே! சித்திரங்களின் தரத்தை எடுத்துகொண்டாலும் கூட சற்று கூட ஒப்பிட முடியாத அளவிலேதான் இருக்கின்றன. சிந்துபாத், லைலா, மந்திரவாதி மூசா இவர்கள் தான் முக்கியமான பாத்திரங்கள். எனக்கு தெரிந்தவரை கன்னித் தீவு கதையை 'சுருக்கமாக' இப்படி சொல்லலாம்.

சிந்துபாத் ஒரு மன்னனின் இளம் தளபதி. லைலா இளவரசி. மூசா என்ற 'கொடிய' மந்திரவாதி 'கன்னித் தீவு' என்ற 'கன்னிகள்' நிறைந்த தீவில் அழகிய நங்கைகளை கொண்டு தனது அந்தபுரத்தை அலங்கரிப்பதையே பொழுதுப்போக்காக கொண்டவன். மூசா அடிக்கடி தனது மாயக் கண்ணாடியில் 'தற்போது உலக அழகி யார்?" என்று கேட்பான். மாயக் கண்ணாடியும் லேட்டஸ்ட் உலக அழகியை உடனடியாக காண்பிக்கும் (குளோபல் போசிசனின் சிஸ்டம்?) உடனே தனது மந்திரப்படையை சேர்ந்த அரக்கி, ராட்சசன், குட்டி பூதம் என யாரையாவது ஒருவரை அனுப்பி அந்த அழகியை தூக்கி வர செய்வான். (பெரும்பாலான அழகிகள் இளவரசிகளாக த்தான் இருப்பார்கள் என்று சொல்லவும் வேண்டுமா?)

அப்படித்தான் ஒரு பொன்மாலைப் பொழுதில் மாயக்கண்ணாடி லைலாவை மூசாவுக்கு காட்டிக் கொடுத்தது. சற்றும் தாமதிக்காமல் மூசா தனது பரிவாரங்களை அனுப்பி பெண் கேட்டான். அரசன் மறுக்கவே லைலாவை சிறிய உருவமாக்கி விட்டான். (இந்த இடத்தில் 'நடந்தது என்ன?' என்று சரியாக தெரியவில்லை, மூசாவே நேரடியாக வந்து பெண் கேட்டதாக கேள்வி பட்டிருக்கிறேன்..!) சிறிய உருவமான லைலாவை பழையபடி மாற்றும் பொறுப்பு நமது கதாநாயகன் சிந்துபாதிடம் ஒப்படைக்கப்படுகிறது. சிந்துபாத்தும் லைலாவை ஒரு பெட்டியில் போட்டு இடுப்பில் கட்டி கொண்டு தனது 'முடிவில்லா' பயணத்தை தொடர்கிறான்.

இந்த பயணத்தின் போது பல நாடுகள், கடல்கள், ஆறுகள், காடுகள் என கடக்கும் சிந்துபாத் எண்ணற்ற இடர்களை சந்திக்கிறான். லட்சிய வீரனின் ஒரே நோக்கம் தனது இளவரசியை இயல்பான வடிவத்திற்கு மாற்ற வேண்டும் என்பதே.

இது இப்படி நடந்து கொண்டிருக்க, கன்னித் தீவில் மூசாவை மகிழ்விக்க அந்தப்புர அழகிகள் ஆசையோடு அவனை நெருங்குவர், மூசாவோ 'தொலைந்து போங்கள்..! எனக்கு லைலா மட்டுமே வேண்டும்' என தனது 'கற்பில்' உறுதியாக இருப்பான். சில சமயங்களில் 'உலக அழகி யார்?' மூசா கேட்கும்போது 'லைலா' 'லைலா' என்ற தனது மாறாத பதிலால் மாயக்கண்ணாடி மூசாவை ரொம்பவும் வெறுப்பேற்றும்.

மூட் அவுட்டு ஆகி மாயக் கண்ணாடியில் 'லைலா எங்கே?" என மருகுவான். கண்ணாடியும் அன்றையை லைலா பற்றிய செய்தியை அப்டேட் செய்யும். உடனே தனது வலது கரத்தை (சீனியர்!) அழைத்து 'உடனே எனக்கு லைலா வேண்டும்' என ஆணையிடுவான். வலது கரம் அன்றைய நாள் யாருடுய கோட்டா என்பதை சரிபார்த்து ஏதாவது ஒரு பரிவாரத்தை லைலாவை தூக்கி வர ஏவி விடுவார். பரிவாரம் லைலாவை தூக்கி போக வர, சிந்துபாத் தனது சாகசத்தால் அதனை முறியடிப்பார். அப்புறம்.... வந்து... பிறகு... அப்பால... ம்... ம்... ம்... ம்... தொடரும்...

தொடர்ந்து வரும் ஒரே காரணத்தால் தமிழ் மக்களிடையே நீண்டுகொண்டே போகும் ஒரு நிகழ்வை குறிக்க 'கன்னித் தீவு' என்ற பதங்கள் பயன்படுத்தபடுகின்றன. 1981 இல் கன்னித் தீவு என்று ஒரு சினிமா வந்திருக்கிறது. ஆயிரத்தில் ஒருவன் படத்தில் '"... இந்த கன்னித் தீவு மண்ணுக்கே எரு ஆக வேண்டியதுதானா? நம்ம சொந்த ஊருக்கு போவது எப்போ?...'' என்று ஒரு சக அடிமை கேள்வி கேட்க, புரட்சித் தலைவர், ''ஏன்... என்ற கேள்வி கேட்காமல் வாழ்க்கை இல்லை..' என்று பாடத் தொடங்குவார். சமீபகால தமிழ் படங்களில் கூட

''சாக்லேட் சாக்லேட் பூவிலே ....

....

பேட்சிலர்க்கு வீடு கொடுத்தா தேங்க்ஸ் சொல்லுவோம்

தினத்தந்தி கன்னித் தீவு எப்போ முடியும்

தெருஞ்சுட்ட தேங்க்ஸ் சொல்லுவோம்...''

மற்றும்

ஒரு குத்து பாட்டில் கூட ...

"....

....

அட கண்ணாளனே கன்னி தீவு ரொம்ப ரொம்ப பெருசு...

பாரு நீதானையா சிந்துபாத்

அட வாடா வாடா வாடா

....

...."

கன்னித் தீவின் பாதிப்புகளை நாம் காண முடியும். கன்னித் தீவு எப்போது முடியும், லைலா எப்போது தனது சுய உருவை அடைவாள் என்பன தீராத கேள்விகளாக இன்றும் பல்வேறுத் தளங்களில் பேசப்படுகின்றன ..! உண்மையில் கன்னித் தீவு கதை முடியாத ஒரு கதையா என்பது விவாதத்திற்கு உரியது அல்ல! என்றோ முடிந்திருக்க வேண்டிய கதைதான்!

அறுபது, எழுபதுகளில் உலக பரிச்சயமற்ற, ஓரளவே படிப்பறிவை பெற்ற, சினிமாவின் மேல் அளவற்ற ஆர்வம் கொண்ட மக்கள் மத்தியில் தினத்தந்தி பெரிய தாக்கத்தை ஏற்படுத்தியிருந்தது. கன்னித் தீவும் மக்களால் விரும்பி படிக்கப் பட்டது.

தற்காலத்தில் மக்களின் ஆதரவை பெற்ற தொலைக்காட்சி தொடர்கள் 'விரும்பி' நீடிக்கப் படுவது கண்கூடு. அது போல அன்று தெரிந்தோ தெரியாமலோ கன்னித் தீவு தினத்தந்தியின் ஒரு அடையாளமாகி போயிருக்கலாம். அந்த அடையாளத்தை தக்க வைத்து கொள்ள வேண்டிய கட்டாயத்தில் தினத்தந்தி கன்னித் தீவு கதையின் போக்கு ஒரு வட்டத்திற்க்குள்லேயே சுற்றி வரும் ஒரு உபாயத்தை பயன்படுத்தத் தொடங்கியிருக்கலாம்.

என்பது, தொண்ணூறுகளில் நான் கன்னித் தீவு கதையை ஒரு சலூனில் தொடர்ந்து படித்திருக்கிறேன். எனது அறிவுக்கு எட்டிய வரை 'கன்னித் தீவு வட்டம்' என்பதை பின்வருமாறு வரையறுக்கலாம்.

.... மந்திரவாதி மூஸாவுக்கு லைலா நினைவு வருகிறது.

.... மாயக்கண்ணாடியில் லைலாவின் லேட்டஸ்ட் லோகேசன் அறியபடுகிறது.

.... ஏதேனும் ஒரு பரிவாரம் லைலாவை கடத்தி வர அனுப்பப்படுகிறது...

.... பரிவாரத்தால் ஏற்பாடு இடர்களை சிந்துபாத் முறியடிக்கிறான்.

.... கடற்கரை/காடு/ நாடு என ஏதேனும் ஒரு இடந்தில் இருக்கும் சிந்துபாத் அப்பகுதியில் அதிகாரத்தில் இருக்கும் மன்னன்/தலைவனுக்கு ஏற்பபடும் ஏதேனும் ஒரு பிரச்சனையை தீர்த்து வைக்கிறான்.

.... மனம் மகிழும் மன்னன்/தலைவன் கப்பலோ, மந்திர பொருளோ, வாகனமோ கொடுக்கிறான்.

.... லைலாவை சுய உருவை அடைய செய்யும் லட்சியத்தை நோக்கி சிந்துபாத் தனது பயணத்தை தொடர்கிறான்.

.... மந்திரவாதி மூஸாவுக்கு லைலா நினைவு வருகிறது...

.... மாயக்கண்ணாடியில் லைலாவின் லேட்டஸ்ட் லோகேசன் அறியபடுகிறது...

.... ஏதேனும் ஒரு பரிவாரம் லைலாவை கடத்தி வர அனுப்பப்படுகிறது...

... அதே.... அதே.... அதே....!

தற்கால கணிப்பொறி புரோகிராம்களில் 'If.. then ... ', 'Do... until ..'' போன்ற கட்டளைகளை சரியான முறையில் கொடுத்தால் ஒரு செயலை சில பல நிபந்தனைகளுக்கு உட்பட்டு முடிவற்று நடத்தி கொண்டிருக்கலாம். இதே உத்திதான் இந்த 'கன்னித் தீவு வட்ட' உத்தியும்.

....கடலில் பயணம் செய்கையில் மூசாவின் ஆட்களால் கப்பல் சிதைக்கப் படுவது...

... கடலில் தத்தளிக்கையில் திமிங்கலத்தால் விழுங்கபடுவது....

... காட்டு மிராண்டிகளிடம் மாட்டி கொள்வது....

... லைலா சிலை பின்னால் இருந்து சாமி போல பேசுவதால் விடுவிக்கப்படுவது...

... எப்போதாவது லைலாவுடன் பேசுவது....

போன்ற காட்சிகளெல்லாம் சில பல மாதங்களுக்கு ஒருமுறை வந்து போகும் வழக்கமான காட்சிகள்தான்.

இந்த 'டெக்னிக்' பற்றி தமிழ் கூறும் நல்லுலகம் அறிய வாய்ப்புகள் சற்று குறைவுதான். ஏனெனில் கன்னித் தீவு கதையை தொடர்ந்து சில பல மாதங்கள் படிப்பவர்கள் குறைவுதான். ஆட்டுக்குத் தாடி போல தினத்தந்திக்கு கன்னித் தீவு ஒரு வெற்று அடையாளம் மட்டுமே! போற்றி புகழ ஒன்றுமில்லை!

ஆரம்பத்தில் கூட சித்திரங்கள் கொஞ்சம் அக்கறையோடு வரையப்பட்டிருக்கின்றன. தற்போது.... சொல்லி கொள்ள முடியாது! ஒரு கதாபாத்திரத்தின் முக சாயலை தொடர்ந்து ஒரு சில கட்டங்களுக்கு கூட ஒரே மாதிரி வரைய முடிவதில்லை.

சமீபத்தில் வெளிவந்த கன்னித் தீவு தொடரை உங்கள் பார்வைக்கு கீழே தந்துள்ளேன். எவ்வளவு முயன்றும் தற்போதுள்ள மூசா, லைலா உருவங்களை சேகரிக்க முடியவில்லை. கிடைத்தால் வெளியிடப்படும்.

தொடக்கத்தில் தாடி வைத்திருந்த சிந்துபாத் காலத்திற்கேற்ப சவரம் செய்து ட்ரிம் ஆகியது எப்போது? கதை எந்த நாட்டை மையமாக கொண்டது? சிந்துபாத் லைலாவை காதலிக்கிறானா? கதாசிரியர் (அல்லது கதாசிரியர்கள்) யார்? மூலக் கதை ஏதேனும் உண்டா? சிந்துபாத் தமிழனா, அரேபியனா? அம்மன் எப்படி வருகிறாள்? மூசாவின் கன்னித் தீவு எங்கே உள்ளது? இதுவரை தொடர்ந்து கன்னித் தீவை படிப்பவர்கள் யாரேனும் உண்டா? லைலாவை பழைய உருவம் அடைய என்ன செய்ய வேண்டும்? என நிறையவே கேள்விகள்...!கன்னித் தீவு தொடர்பாக தகவல்கள் தெரிந்தவர்கள் பகிர்ந்து கொள்ளலாமே!

எனது முந்தய பதிவிற்கு வருகை தந்த அனைவருக்கும் நன்றி. உங்களுடைய பின்னோடங்களுக்கு எனது பதிலை இங்கே காணுங்கள்.

காமிக்ஸ்களில் சில களைகள்!

2008-12-09T17:00:00.019+05:30

காமிக்ஸ் படிப்பவர்களை தொடர்ந்து காமிக்ஸ் படிக்க தூண்டுவன ஹீரோக்களின் சாகசங்கள், காமெடிகள், அற்புதமான கதையோட்டம் எல்லாவற்றிக்கும் மேலாக நிகழ்வுகளை கண்முன் நிறுத்தும் தரமான சித்திரங்கள் போன்றவையே.

அடிப்படையில் அச்சு ஊடகமாக இருந்ததாலும் ஒலி, ஒளி ஊடங்களை போல காமிக்சும் ஒரு ஊடகமே! (நன்றி: ஓவியர் ட்ராஸ்கி மருது) காமிக்ஸ் என்பது அச்சு, ஒளி, ஒலி மூன்றும் கலந்த ஒரு கலவையாக கூட கருதலாம். ஏனெனில் காமிக்ஸ் படிக்கும் ஒருவர் மேற்கண்ட மூன்றின் உணர்வையும் ஒரு சேர அனுபவிப்பார். பிற ஊடகங்களை போலவே காமிக்ஸ் உலகத்திலும் ஹீரோக்கள் ஒரு முன்மாதிரியாக, ஜெயிக்க மட்டுமே தெரிந்தவனாக, படிப்பவர்களுக்கு சந்தோசம் அளிப்பவர்களாகவே இருக்கிறார்கள். வேதாளன் (Phantom), டின் டின், டார்ஜான், சூப்பர் மேன் , ஸ்பைடர் மேன் போன்றவர்கள் மிக எளிதாக எதிரிகளை வென்று வாகை சூடுவர். இது போன்ற கதைகள் சற்றே சலிப்பூட்டிய காலக்கட்டங்களில் தான் ப்ரூனோ பிரேசில் , கேப்டன் பிரின்ஸ், ப்ளூ பெர்ரி போன்ற நடைமுறை சிக்கல்களை சந்திக்கும் ஹீரோக்களும், லக்கி லுக் போன்ற காமெடி ஹீரோக்களும் வாசகர்களிடையே பெரும் வரவேற்பைப் பெற்றனர்.

சினிமாவை போலவே காமிக்ஸ் உலகத்திலும் ரஜினி, கமல், வடிவேலு, பசுபதி என வகை வகையாக ஹீரோக்கள் படைக்கபட்டிருக்கிறார்கள். ஒவ்வொரு ஹீரோவுக்கும் ஒரு ரசிகர் கூட்டம் உண்டு. (ஆனால் இவர்கள் விஜய், அஜித் விசிறிகளை போல கலாய்த்து கொள்வது எல்லாம் இல்லை).

பெரும்பாலும், காமிக்ஸ் வாசகர்கள் ஹீரோக்களை 'கதா நாயகனாக' தான் (கதையின் நாயகன்!) பார்க்கிறார்களே தவிர 'ஹீரோ வழிபாடாக' பார்ப்பதில்லை. அதனால்தான் சூப்பர் ஹீரோக்களுக்கு இணையாக ப்ளூ பெர்ரி போன்றவர்களும் வாசகர்கள் மனதில் இடம் பிடித்து இருக்கிறார்கள். பொதுவாக கதாநாயகர்கள் அவர்கள் செயல்படும் நாட்டின் அரசியல், இன, மத பின்புலங்களை கொண்டவர்களாகவே இருக்கிறார்கள். ஏனெனில் கதாநாயகர்களை உருவாக்கும் கதாசிரியர்களும் சற்றே கற்பனை வளம் மிக்க சக மனிதர்களே. அவர்கள் சேகரித்த அறிவு அவர்கள் சார்ந்த சமுதாய, அரசியல், மத சூழலில் இருந்து பெறப்பட்டவையே ஆகும். (இதனை சற்றே ஆழமாக காண இங்கே கிளிக் செய்யுங்கள்!)

பிற சமுதாயத்தை, மதத்தை, இனத்தை பற்றி கதாசிரியர் என்ன நினைக்கிறாரோ அவற்றையே கதாநாயகனும் பிரதிப்பளிக்கிறான். சட்டியில் உள்ளதுதானே அகப்பையில் வரும்! சில சமயங்களில் கதாசிரியரின் கட்டுப்பாட்டையும் கடந்து வெகு இயல்பாக மத, இன, அரசியல் துவேசங்கள் (அல்லது அறியாமை!) வெளிப்பட்டுவிடும். சில கதாசிரியர்கள் தங்களது இனவாத கருத்துகளை வலிந்து திணிப்பதும் உண்டு. உலகப்போரை மையமாக கொண்டு உருவாக்கப்பட்ட ஐரோப்பிய, அமெரிக்க காமிக்ஸ்-களில் ஜெர்மனி போன்ற அச்சு நாடுகள் மோசமானதாக சித்திரிக்கப்பட்டது கதைக்கு அவசியம் என்பதும் மறுக்க இயலாத கருத்தே.

பிற இன, மத, நாட்டு மக்களை பற்றி ஒரு வித கருத்துக்கோவைகளை உருவாக்குவதில் ஊடங்கங்கள் முக்கிய பங்கு வகிக்கின்றன. சுய சிந்தனை இல்லாமல் அவற்றை அப்படியே ஏற்று கொள்வதும், பரப்புவதும் நகைப்புக்குரியது. ஹோலிவூட் படங்களை பார்க்கும் நம்மவர்கள் இந்த உலகத்தை அமெரிக்கர்களால் மட்டுமே காப்பாற்ற முடியும் என்று நினைத்தால், நம்ம கோடம்பாக்க டூயட்களை பார்க்கும் அமெரிக்கன், தமிழன் 'அந்த' விசயத்துக்கு ஏன் இத்தனை மரங்களை கிராபிக்ஸ் கலக்கலுடன் சுற்றுகிறார்கள் என்று வியக்க மாட்டானா?

உதாரணமாக ஒரு பாகிஸ்தானியை அமைதியை விரும்பும் சாந்தரூபியாக நம்மால் கற்பனை செய்ய முடியுமா? முடியாது என்பதே பெரும்பாலானவர்களின் பதிலாக இருக்கும். ஏனெனில் அரை நூற்றாண்டுக்கும் மேலாக பாகிஸ்தானிகளை பகைவர்களாக, கொடூரர்களாகவே நமக்கு நமது ஊடகங்கங்கள் அறிமுகம் செய்துள்ளன. அதே சமயம் இந்தியர்களை இஸ்லாத்திற்கு எதிரிகளாகவே பாகிஸ்தானிய ஊடகங்களும், அரசியல்வாதிகளும் பாகிஸ்தானிய மக்களுக்கு போதித்து வருகிறார்கள். ஆனால் இரு தரப்பிலும் உண்மை முரண்பாடாகவே இருக்கிறது.

இந்த சூழ்நிலையில் ஒரு இந்திய கதாசிரியரால் உருவாக்கப்படும் ஒரு கதையில் பாகிஸ்தானும் , அதன் மக்களும் எதிர்மறையாகவே வெளிபடுத்தப்படுவார்கள். அது ஒரு வியாபார உத்தியாகவும், மிக இயல்பனதாகவுமே இருக்கும். தற்கால உலகமய சூழலில் கூட இந்த நிலைமை எனில் சென்ற நூற்றாண்டில் - தகவல் தொடர்பை பொறுத்தவரை தற்போதைய நிலையுடன் ஒப்பிட்டால் கற்காலம்!- என்ன நிலைமை இருந்திருக்கும்? சராசரி மக்கள் பிற இனத்தவரை, பிற நாட்டவரை அரைகுறை அறிவும், இனத் திமிரும், தாங்கள் மட்டுமே அறிவாளிகள் மற்றவர்கள் எல்லாம் மூடர்கள் என்ற 'மூடநம்பிக்கையும்' கொண்ட சிலரிடம் இருந்து பெற்ற தகவல்களை கொண்டே மதிப்பிட்டுருப்பார்கள்.

இக்கால கட்டத்தில் உருவாக்கப்பட டின் டின், வேதாளன், டார்ஜான் போன்றவர்கள் இன துவேசத்துடன் செயல்பட்டதாக மனித உரிமை ஆர்வலர்களால் குற்றம் சாட்டப்பட்டுள்ளார்கள். குறிப்பாக டின் டினின் 'காங்கோவில் டின் டின்' என்ற படைப்பு நூலகங்கள், புத்தக கடைகளில் குழந்தைகள் பிரிவில் இருந்து நீக்கப்பட்டுள்ளது. கறுப்பின மக்களையும், பிற கீழை நாட்டு மக்களையும் ஐரோப்பிய, அமெரிக்க கதாசிரியர்கள் தங்களுடைய கதைகளில் மட்டம் தட்டியே எழுதியிருக்கிறார்கள். (இது தொடர்பான காமிக்ஸ் டாக்டரின் மற்றொரு இடுகையை இங்கே காணுங்கள்!)

இந்தியர்கள் சம்பந்தப்பட்ட சில காமிக்ஸ்-களில், திரைபடங்களில் நாம் இவற்றை கவனித்திருப்போம். ஆனால் அதனை சப்தமின்றி ஏற்று கொள்வதே இயல்பாகி போயிருக்கிறது. ஏனெனில் நமது மனநிலை அப்படி உருவாக்கப்படிருக்கிறது. மக்களை அடிமைப்படுத்த வேண்டுமானால் முதலில் அவர்களுடைய கலாச்சாரம், மதம், மொழி குறித்த பெருமித உணர்வை அம்மக்களிடம் அகற்ற வேண்டும் என்பதே ஆதிக்கவாதிகளின் அடிப்படை விதி.

ஐரோப்பியர்கள் இந்தியா உள்ளிட்ட காலனி மக்களிடம் அவர்களுடைய நிறம், மொழி, கலாச்சாரம் போன்றவை கேலிக்குரியவை, வெள்ளையர்களின் நிறம், மொழி, கலாச்சாரம் மட்டுமே உயர்ந்தது என்ற கருத்தை ஆழ விதைத்தார்கள். இது பாமரர்களை விட படித்தவர்களிடமே மாற்ற முடியாத அளவுக்கு பதிந்து போனது. ஏனெனில் இவர்கள் படித்தது 'வெள்ளையர்களிடம்'. இந்தியாவில் நமது 'தாத்தா' சுதேசி சிந்தனைக் கொண்டிருந்தாலும் 'மாமா' வெள்ளைச் சிந்தனையுடன்தான் இந்தியாவை உருவாக்கினார். இதனால்தான் ஆயிரம் ஆயிரம் ஆண்டுகள் வரலாறு கொண்ட இந்தியாவின் வரலாற்றுப் பெருமிதம் அகற்றப்பட்டு இந்தியாவின் வரலாறு என்பதே ஒரு சில நூற்றாண்டுகள் தான் என்பது ஸ்தாபிக்கப்பட்டது. வெள்ளையர்களோ அல்லது வெள்ளையர்களால் 'பண்படுத்தப்பட்டவர்களோதான்' இந்தியாவை காப்பாற்ற தகுதி வாய்ந்தவர்கள் என்பதை விதியாக்கினார்கள். இதன் விளைவாகவே வெள்ளைத் தலைவிகள் இன்னும் நம்மை காப்பாற்றி கொண்டு இருக்கிறார்கள். தொடர்ந்து வரும் வாரிசுகளும் வெள்ளை துணையுடனே நம்மை ரட்சிப்பார்கள் என்ற நம்பிகையுடனே சராசரி இந்தியன் இருக்கிறான்.

நிற வெறி ஆட்சியாளர்களின் இந்த விஷ விதை இந்தியாவில் மிக கவனமாக மிஷனரிகளால் இன்றும் தொடரப்படுகிறது. மக்கள் தங்களுடைய 'கருப்பு' கடவுளை கூட வெள்ளையாக்க துணிகிறார்கள். ஊடகங்கள் இங்கிலாந்து ராணியின் இந்திய வருகையை 'ராணி இந்தியா வருகை' என்றே கூறி விசுவாசத்தை வெளியிடுகின்றன. சில வருடங்களுக்கு முன் சுற்றுலா பயணியின் விசாவுடன் இந்தியா வந்து 'ஏழைகளுக்கு' வருட கணக்கில் சேவை' செய்து வந்த மிசனரி ஆட்களுக்கு எதிராக சிலர் ஆர்ப்பாட்டம் செய்தபோது நமது காவலர்கள் வெளிநாட்டு ஆட்களை கைது செய்ய நடவடிக்கை எடுக்காமல் ஆர்பாட்டக்காரர்களை கைது செய்த கூத்தும் நடந்தது. என்னே விசுவாசம்! கொஞ்சம் யோசித்து பாருங்கள். எந்த ஈரோப்பிய நாட்டிலாவது விசாக் காலம் முடிந்து தங்கும் இந்தியனுக்கு இப்படியா மரியாதை செய்வார்கள்?

இன்றும் கூட நடைமுறை வாழ்க்கையில் நாமே ஒரு ஆப்ரிக்கரை ஒருவித அச்சத்துடன் பார்ப்போம், ஆனால் ஒரு வெள்ளையரை மரியாதையுடன் பார்ப்போம். நம்மை அறியாமலே இவ்விதமான விழுமியங்கள் நமது மனதில் பதிந்துள்ளன. தெருவில் பர்சை அடித்து பிடிப்பட்டவன் நம்மில் ஒருவன் எனில் அவனை துவைத்து காய போட்டு விடுவோம். பர்சை அடித்தவன் ஒரு வெள்ளையன் எனில் நாமோ நமது காவல் துறையோ என்ன செய்வோம்... யோசியுங்கள்!

வெள்ளையர்கள் நம்மை கேவலப்படுத்துவதும், நாம் அவர்களை கௌரவப்படுத்துவதும் ஒரு புறம் இருக்கட்டும். நாம் நமது நாட்டிலேயே உள்ள மலைவாசி பழங்குடியினரை எப்படி நடத்துகிறோம்? அவர்கள் காட்டுமிராண்டிகள், அறிவிலிகள் என்ற மனோபாவத்துடன்தானே? பார்க்க போனால் மனிதன் தான் சாராத இனம், மதம், மொழி, நாடு குறித்த தவறான புரிதல்களுடந்தான் வளர்க்கபடுகிறான் என்று தெரிகிறது. இவ்வித தவறான விழுமியங்களை தலைமுறை தலைமுறைகளாக உயிர்ப்புடன் வைத்திருப்பதில் கதைகள், காப்பியங்கள், வரலாறுகள், ஊடகங்கள் போன்றவை முக்கிய இடம் பெறுகின்றன. அதிலும் சிறுவர்களுக்கு எழுதப்படும் கதைகள், காமிக்ஸ்கள், நாவல்கள் போன்றவை பிஞ்சு மனதில் நஞ்சை விதைக்கின்றன. எனவேதான் மனித உரிமை ஆர்வலர்களின் கவனிப்புக்கு டின் டினின் காமிக்ஸ்கள் உள்ளாகி வருகின்றன.

தற்காலத்தில் பெரும்பாலான காமிக்ஸ் படைப்புகள் இது போன்ற பிற்போக்கு கருத்துகளும், தீய பழக்கங்களும் இல்லதாவாறே படைக்கப்படுகின்றன. துப்பாக்கி குழலுக்கு போட்டியாக புகை விட்டுகொண்டிருந்த நமது லக்கி லுக் கூட இப்போது புகைப்பதை விட்டு விட்டு புல் மென்று கொண்டு இருக்கிறார். (அன்புமணி கவனிக்க!)

இன வாத நஞ்சு உள்ள கதைகள் அவை உருவாக்கப்பட்ட காலத்தில் இயல்பானதாக, எதிர்ப்பின்றி இருந்திருக்கலாம். ஆனால் வெள்ளையர்கள் பதித்த அடிமை உணர்வை பெரும்பாலான மக்கள் கைவிட்டு வருவதால் அத்தகைய படைப்புகள் தற்போது கேள்விக்கு உள்ளாக்கப்படுகின்றன. இது குறித்து ஜனவரி 2008 - உயிர்மை இதழில் சு.கி. ஜெயகரன் 'சீமையிலிருந்து வந்த சித்திரக்கதை நாயகர்கள்' என்ற தலைப்பில் ஒரு அருமையான கட்டுரை எழுதியுள்ளார். படித்துப் பாருங்கள் . காமிக்ஸ்-களின் பின்னால் இப்படி ஒரு கருத்தியலும் உண்டா என்ற வியந்து போவீர்கள்!

ஒரு காமிக்ஸ் உருவாக்கும் போது கதை நடைபெறும் நாடு, கலாச்சாரம், மக்கள் குறித்த விரிவான ஆராய்ச்சியின் பிறகே உருவாக்கப்படுகிறது. இனவாத குற்றச்சாட்டுகளுக்கு உள்ளான சில பல படைப்புகள் தெரிந்தோ, தெரியாமலோ தவறான புரிதல்களுடன் உருவாக்கப்பட்டுள்ளன. அவற்றை குறிப்பிட்டு சிறுவர்களுக்கு காமிக்ஸ்களை மறுப்பது 'மூட்டை பூச்சிக்கு பயந்து வீட்டை கொளுத்தியது' போலாகி விடும். அது போன்ற காமிக்ஸ்களை மட்டும் தவிர்க்கலாம். அமெரிக்க மண்ணில் நடைபெறும் கதைகளை கொண்ட காமிக்ஸ்களில் செவ்விந்தியர்கள் பற்றி எப்படி கூறப்பட்டிருந்தாலும் அவர்கள் வெள்ளையர்களால் கொடுமைக்குள்ளானத்தை வாசகனால் எளிதில் புரிந்து கொள்ள முடியும். மேலும் உலகம் சுருங்கி விட்ட நிலையில் ஒரு இனம், நாடு பற்றி தவறான பிரச்சாரங்களை முன்பு போல அவ்வளவு எளிதாக மேற்கொண்டுவிட முடியாது என்பது சற்றே ஆறுதல் தரும் செய்திதான்.

நன்றி: சு.கி. ஜெயகரன், உயிர்மை, கிங் விஸ்வா

மேலும் அறிந்து கொள்ள:

1.............. 2 .................. 3................... 4...................

எனது முந்தய இடுகைக்கு பின்னூட்டம் இட்ட அனைவருக்கும் நன்றி!

அம்புலிமாமாவின் முதல் இதழ்

2008-11-16T20:17:00.033+05:30

'வேதாளம் முருங்கை மரம் ஏறிடிச்சு!', 'சற்றும் மனம் தளராத விக்கிரமாத்தன் போல..!', 'சரியான அம்புலிமாமா கதையாயிருக்கு!' போன்ற சொற்றொடர்கள் தமிழக வெகுஜனங்களால் அடிக்கடி பயன்படுத்தப்படுகின்றன. மேற்கண்ட சொற்றொடர்களின் பிரபலத்திற்கு காரணம் அம்புலிமாமா! கடந்த 61 வருடங்களாக தமிழக குழந்தைகளுக்கு தளராது சேவை செய்து வரும் சிறுவர் மாத இதழ்.

தமிழக குழந்தை இலக்கிய வரலாற்றில் மிக நீண்ட காலமாக அம்புலிமாமாவின் இந்த சாதனை முறியடிக்கப்படவேயில்லை. அதற்கான வாய்ப்புகளும் இனி இல்லை. ஏனெனில் அம்புலிமாமா தற்போது நவீனமயமாக்கபட்டுள்ளது. எழுத படிக்க தெரிந்த பெரும்பாலான தமிழர்களுக்கு அம்புலிமாமாவை படிக்கும் வாய்ப்பு ஒருமுறையேனும் கிட்டியிருக்கும்.

எங்கிருந்துதான் இவர்களுக்கு கதைகள் கிடைக்கின்றனவோ என்று வியக்கும் அளவுக்கு எண்ணிலடங்கா கதைகளை வெளியிட்டு கொண்டேயிருக்கிறார்கள்.

புராணம், பஞ்ச தந்திரம், நாட்டுப்புறக்கதைகள், அயல்நாட்டு கதைகள், பறவை, விலங்கு கதைகள், மாயாஜால கதைகள், இதிகாசங்கள் என அம்புலிமாமாவில் வெளிவராத கதைகளே இல்லை எனலாம்.

பெரும்பாலும் சிறுவர் பத்திரிகைகளில் ஒரு கதைக்கு ஒரு படம் மட்டுமே வெளியிடுவார்கள். ஆனால் அம்புலிமாமாவில் ஒரு பக்கத்திற்கு ஒரு படம் வீதம் அதுவும் வண்ணத்தில் வெளியிடுவார்கள். சித்திரங்களின் தரம் கண்ணில் ஒற்றிகொள்ளும் படி அற்புதமாக இருக்கும். எனது நினைவுகளின் படி சங்கர் என்பவரின் ஓவியங்கள் அம்புலிமாமாவின் பிரிக்க முடியாத அங்கமாகவே இருக்கின்றன.

1947 - ஜூலை மாதம் முதல் அம்புலிமாமா வெளிவந்தது. சுதந்திரம் தொடர்பான பிரச்சனைகள் உச்சத்தில் இருந்த காலக்கட்டம். புதிய இந்தியாவில் என்னென்ன மாற்றங்கள், கட்டமைப்புகள் செய்யப்பட வேண்டும் போன்ற விவாதங்கள் சூடுபிடித்த நேரம் அது. ஒரு நாட்டின் வருங்கால தூண்கள் தற்கால குழந்தைகள்தான். அவர்களுடைய குழந்தைப் பருவம் குதூகலமாக, வண்ணமயமாக, வளமான கற்பனைகளுடன், எதிர்காலம் குறித்த நம்பிக்கையுடன், தேசப்பற்றுடன் அமைய வேண்டும். இந்த உயரிய நோக்கத்தை நிறைவேற்றும் வண்ணமே நாகி ரெட்டி, சக்கரபாணி ஆகிய நற்சிந்தனையாளர்களால் அம்புலிமாமா தொடங்கப்பட்டது.

அச்சுத்துறையின் வளர்ச்சிக்கு முன்னர் நிலவொளியில் சிறுவர்களுக்கு கதை சொல்லும் புராதான வழக்கமே இருந்தது. எனவே கதை சொல்லுதலை நிலவுக்கு தொடர்புப் படுத்தி அம்புலிமாமா (நிலவு) என்று பெயரிடிருக்கலாம் என்பது எனது எண்ணம். முதல் இதழின் சில பகுதிகளை பார்ப்போம்.

அட்டை: 165 x 215 மில்லி மீட்டர் அளவு கொண்ட பல வண்ண அட்டை. ஒரு வியப்பான செய்தி என்னவென்றால், அந்த காலத்திலேயே அடிப்படை வண்ணங்களுடன் கூடுதலாக வெள்ளி (சில்வர்) வண்ணத்தில் அச்சிட்டு அட்டையை மெருகேற்றியுள்ளனர். இதனை ஒரு புரட்சி என்றே சொல்லலாம்.

விலை: ஆறு அணா. மொத்தப்பக்கங்கள்: 68 (அட்டைகள் நீங்கலாக). துரதிஷ்ட வசமாக என்னிடம் கடைசி அட்டையும், நான்கு பக்கங்களும் இல்லை.

முதல் புன்னகை என்ற தலைப்பில் ஓர் அறிமுகம் கொடுக்கப்பட்டுள்ளது. அவசியம் படித்து பாருங்கள். அசந்து போவீர்கள்! (இறுதி பகுதி இல்லை, மன்னிக்கவும்)

இதழ் முழுவதும் தெளிவான படங்கள் அழகுற அச்சிடப்பட்டுள்ளன. இதழை முழுக்க படித்தால் வெளியீட்டாளர்களின் உழைப்பை புரிந்து கொள்ளலாம். தற்போது வெளிவரும் சில சிறுவர் இதழ்களின் தரத்தை, சித்திரங்களின் தெளிவை முதல் அம்புலிமாமவுடன் ஒப்பிடவே முடியாது. 61 ஆண்டுகளுக்கு முன்னரே அப்படி அசத்தியிருக்கிறார்கள்!

அன்றைய சந்தா விவரங்கள். சுவராஸ்யமாக இருக்கிறது அல்லவா?

சென்ற ஆண்டு அம்புலிமாமாவின் வைர விழா. 61 ஆண்டுகள் ஆனாலும் வடிவமைப்பில் பெரிதாக மாற்றம் ஒன்றும் இல்லை. உள்ளடக்கமும், இதழ் அளவும் சற்றே மாறியுள்ளது. வைர விழா சிறப்பிதழில் வெளியான ஆசிரியர் உரைகளை படியுங்கள். நிறையவே ஆர்வம் கொள்வீர்கள்; அம்புலிமாமாவை வாங்க ஓடுவீர்கள்!

சென்ற வார தினத்தந்தியின் 'சிறுவர் தங்க மலரில்' அம்புலிமாமாவின் 61 ஆண்டுகால சாதனையை குறிப்பிட்டுயிருந்தார்கள். (நன்றி: மன்னர் விஸ்வா) அதனையும் உங்கள் பார்வைக்கு வைக்கிறேன்.

உங்களுடைய ஆர்வத்தை பொறுத்து அம்புலிமாமாவின் முதல் இதழின் பிறப்பகுதிகளை இனி வரும் இடுகைகளில் காணலாம்.

எனது முந்தய இடுகைக்கு பின்னூட்டம் அளித்த அனைவருக்கும் நன்றி! உங்களது பின்னூட்டத்திற்கு எனது பதில்களை இங்கே காணுங்கள்.

காமிக்ஸ் டாக்டரின் புதிய இடுகை ரொம்பவும் அசத்துகிறது! அவசியம் நீங்களும் ஒரு நடை போய் பார்த்துட்டு வாங்க!

மன்னர் விஷ்வா ஜேம்ஸ் பாண்டுடன் மர்ம கோட்டைக்கு போய் வந்திருக்கிறார். அவருடைய அனுபவங்களை இங்கே காணலாம்.

மீண்டும் சந்திப்போம்...

காலத்தால் முந்தியது காமிக்ஸ் கலையே!

2008-11-09T10:38:00.021+05:30

தமிழ் கூறும் நல்லுலகில் 'காமிக்ஸ்' என்றாலே அது சின்னப்பசங்க சமாச்சாரம் என்ற எண்ணம் ஆழ வேருன்றி உள்ளது. இங்கு மட்டுமல்ல உலகெங்கும் அப்படிதான் இருந்திருக்கிறது. காலப்போக்கில் அந்த தவறான எண்ணம் மேலைநாடுகளில் மாறி விட்டிருக்கிறது. இங்கு மட்டும் காமிக்ஸ் வாசிப்பு அங்கீகரிக்கப்படாமலேயே தொடர்கிறது.

உண்மையில் காமிக்ஸ் வடிவில் செய்தி சொல்வது என்பது நமது ஆதி முன்னோர்களிடம் இருந்தே பரிணமித்து வந்திருக்கிறது. குகைச்சுவர்களில் தங்கள் அனுபவத்தில் கண்ட நிகழ்வுகளை குறியீடுகளாக வரைய தொடங்கிய மனிதன் பின்னர் ஒன்றுடன் ஒன்று தொடர்புடைய சித்திரங்களாக வரைய தொடங்கினான். இதுவே காமிக்ஸ் வடிவத்தின் தொடக்கம் என்று கூறலாம்.

ஆதி குறியீடுகள் எழுத்துக்களாக, மொழிகளாக பரிணாமம் அடைந்தபின் சித்திரங்களின் தேவை சற்றே குறைந்தது. மன்னர்களின் காலத்தில் அவர்கள் தங்களது புகழை, கலாச்சாரத்தை, கடவுளர்களின் கதையை காலங்கள் கடந்தும் நிலைக்க செய்ய விரும்பினர். இப்பணிக்கு சித்திரங்களும் சிற்பங்களுமே பெரிதும் பயன்படுத்தப்பட்டன.

நமது கோயில்களில் உள்ள சித்திரங்களும் சிற்பங்களும் எதோ ஒரு கதையை இன்னும் சொல்லிக்கொண்டுதான் இருகின்றன. சித்தன்ன வாசல் ஓவியங்களும் கங்கை கொண்ட சோழபுரம், தாராசுரம், கீழப்பழூர் போன்ற எண்ணற்ற கோயில்களில் உள்ள சிற்பங்களும் நமது முன்னோர்களின் தொடர்பியல் திறனுக்கு சான்று பகிர்கின்றன.

மகாபலிபுரத்தில் உள்ள மகிசாசுர மர்த்தினி அசுரனை வதம் செய்யும் காட்சி, கங்கை கொண்ட சோழபுரத்தில் உள்ள புராணக் காட்சிகளை '3D' காமிக்ஸ்களாக கீழே காணுங்கள்.

'படம் பார்த்து கதை சொல்வது' நமக்கொன்றும் புதிதல்ல. இருப்பினும் 'காமிக்ஸ்' என்பது தமிழக வெகுஜனத்தால் இன்னும் கண்டுகொள்ளவேபடவில்லை. வெகுஜன அங்கீகாரத்திற்காக காமிக்ஸ் பட்ட பாடுகளை காமிக்ஸ் ஆர்வலரும் புகழ்பெற்ற ஓவியருமான மருது அவர்கள் 'காமிக்ஸின் கதை' என்ற தலைப்பில் குமுதம் தீராநதியில் சொல்லியிருக்கிறார். படித்து பார்த்தீர்களானால் காமிக்ஸ் வாசகன் என்று சொல்லிக் கொள்ள நாம் வெட்கப்படத் தேவையில்லை என்பது நன்றாகவே புரியும். ஆம்! காலத்தால் முந்தியது காமிக்ஸ் கலையே!

நன்றி: ஓவியர் மருது, குமுதம் தீராநதி

வாண்டுமாமா - சிறுவர் இலக்கியத்தின் சிற்பி!

2008-11-01T22:49:00.022+05:30

நமது இல்லங்களில் விழாக்கள் நடக்கும்போது கேமரா வைத்திருக்கும் நாம் போவோர் வருவோரையெல்லாம் போட்டோ எடுப்போம். நம்மை ஒரு போட்டோவில் கூட பதிய மறந்துவிடுவோம். அதுபோல உள்ளூர் கதைகள், உலக இலக்கியங்கள், புராணங்கள், புதிர் கதைகள், அறிவியல் உண்மைகள், அறநெறிகள், வேடிக்கை விளையாட்டுகள், விந்தை செய்திகள் என எல்லாவற்றையும் நமக்கு அறிமுகம் செய்த வாண்டுமாமா தன்னை பற்றிய செய்திகளை ஏனோ நமக்கு தெரிவிக்கவில்லை.

தமிழகத்தில் 'முற்போக்கு, பிற்போக்கு, விளிம்புநிலை, நவீனம், அது... இது...' என இருக்கிற இலக்கியத்தையும் கூறு போட்டு குழுக்கள்தான் உருவாகி கொண்டிருக்கின்றனவே தவிர குழந்தைகளுக்காக எழுதும் போக்கு சமீப ஆண்டுகளில் குறைந்துகொண்டே வருகிறது.

சிறுவர் இலக்கியம் படைக்கும் எழுத்தாளர்கள் அவ்வளவாக கொண்டாடப்படுவதில்லை. இப்போக்கினால்தான் வாண்டுமாமா போன்றவர்கள் குடத்தில் இட்ட விளக்காகி போனார்கள்.

சுமார் பத்து ஆண்டுகளுக்கு முன்பு தினமணியின் தமிழ் மணியில்? (அப்படித்தான் நினைக்கிறேன்) வாண்டுமாவை பற்றிய ஒரு கட்டுரை வெளியானது. நான் இதழியல் படித்தபோது தயாரித்த 'பாரதி' என்ற 'சிறுவர் இதழில்' அந்த கட்டுரையை 'சுட்டு' போட்டேன். உங்களுக்காக... சுட்டதை மீண்டும் சுட்டு இங்கே தந்துள்ளேன்.

வாண்டுமாமா விசிறிகள் அவரை பற்றிய செய்திகளை பகிர்ந்துகொள்ள அன்புடன் அழைக்கிறேன். வரும் இடுகைகளில் வாண்டுமாவின் படைப்புகள், கதாபாத்திரங்கள் குறித்து பார்க்கலாம்.

இந்த வலைப்பூவை சிறுவர் இலக்கியம் குறித்த செய்திகளுக்கு அர்ப்பணிக்க நினைக்கிறேன். காமிக்ஸ் பற்றிய செய்திகளையும் அவ்வபோது பூக்க செய்யலாம்.

நண்பர் விஷ்வாவின் குத்தல்களுக்கும், டாக்டர் சதீஷின் அவதூறுகளுக்கும் பதில் அளித்து விட்டேனா என வாசக பெருமக்கள்தான் தீர்ப்பு சொல்ல வேண்டும்!

மீண்டும் சந்திப்போம் ..!

கொஞ்சம் சுய புராணம் ...

2008-11-01T21:47:00.003+05:30

நான் பிறந்தது, வளர்ந்தது எல்லாமே கிராமத்தில்தான். எனது குழந்தை பருவத்தில் பள்ளி விட்டதும் அந்தி சாயும் வரை விளையாடுவோம். இருட்ட தொடங்கும் நேரத்திலேயே பெரும்பாலான வீடுகளில் சோறு ஆக்கி குழம்பு வைத்து விடுவார்கள். தெருவில் கிடக்கும் பட்டறை கல்லில் (சமதளமான கல்) சின்ன பசங்க எல்லோரும் சாப்பிடுவோம்.

அந்த நேரத்தில் தான் எங்கள் அப்பாயிகளும், அம்மாயிகளும் (பாட்டிகள்) எங்களுடைய தர்பாருக்கு வருவார்கள். பாவப்பட்ட நல்ல தங்காள் கதையிலிருந்து பழிவாங்கும் நல்ல பாம்பு கதை வரை சொல்லி கொண்டே இருப்பார்கள். மந்திரவாதி கதைகளும், கொல்லி வாய் பிசாசு கதைகளும் எங்களை ரொம்பவே மிரட்டியதுண்டு. சில கதைகள் ஒரே நாளில் முடியாமல் தொடர் கதைகள் ஆனதும் உண்டு.

பள்ளிக்கூடம் சென்று படிக்க கற்று கொண்டதும் கண்ணில் படும் காகிதங்களை எல்லாம் படிக்கும் ஓர் ஆர்வம் தோன்றியது. அப்படி படித்த ஒரு கதைதான் 'கபீஷ்' . கபீஷ் கதையில் இரண்டு பக்கங்கள் மட்டுமே எனக்கு கிடைத்தன. கதையின் முடிவு தெரியாமல் காகிதம் 'பொறுக்கும்' (டாக்டர் சதீஷ்! சந்தோசமா?) வேலையை என் கடமையாகவே கொண்டேன். இரண்டு வருடங்கள் கழித்து 1986-ல் அப்பா ஒரு பூந்தளிர் வாங்கி கொடுத்து எனது தீரா தாகத்தை தீர்த்து வைத்தார்.

பூந்தளிர் வாங்கியதும் நான் முதலில் படித்தது கபீஷ் தான். பூந்தளிரில் வாண்டுமாமா தன்னுடைய எல்லாவிதமான ஆற்றல்களையும் காட்டியிருப்பார். முதலில் அறிமுகமானதாலோ என்னவோ பூந்தளிரும் வாண்டுமாமாவும் என் மனதில் நீங்கா இடம் பிடித்து விட்டனர். அதனால்தான் அவரை பற்றிய தகவல்களுக்கு முதலிடம் தருகிறேன்.

சுய புராணத்தில் நிறையவே மிச்சம் இருக்கிறது! நேரம் கிடைக்கும்போது (உங்களுக்குத்தான்..!) பேசலாம்...